BAUKAU, STLTIMORLESTE.com – Sekretariu Jeral Partidu FRETILIN, Mari Alkatiri ofisializa atividade movimentu apoiu ekonomia militante FRETILIN iha Suku Ostiku, Postu Administrativu Vemasi, Munisipiu Baukau.
Atividade ekonomia nee inisia husi movimentu apoiu ekonomia militante FRETILIN, ho hand-traktor unidade 20 neebe ba objetivu atu fila rai ba komunidade sira neebe presiza.
“Programa nee inisiativa koordenador ho nia grupu ami mai fo deit apoiu politiku husu nai Maromak para buat nee susesu, maibe programa nee diak tebes hau fiar, tanba ita fila rai ho enxada nee buat ida, tau ona makina nee buat seluk fali ona,” hateten Mari Alkatiri ba jornalista sira, hafoin ofizializa atividade movimentu ekonomia iha Suku Ostiku, Postu Administrativu Vemasi, Munisipiu Baukau, Kuarta (20/08/2025).
Sekretariu Jeral Partidu Fretilin nee konsidera, programa movimentu apoiu ekonomia militante FRETILIN Baukau nee diak, tanba movimentu bele inisiativa sosa rasik ekipamentu hanesan hand-traktor hodi apoiu fila rai ba komunidade agrikultores neebe presiza.
Nia katak, inisiativa movimentu refere sei ajuda rendimentu ekonomia komunidade agrikultores sira, tanba antes nee komunidade maioria utiliza ekipamentu servisu hanesan enxada neebe la garante aumenta numeru produsaun, maibe liu husi apoiu fila rai ho makina sira sei iha mudansa ba numeru produsaun iha rai laran.
“Mensajen mak uza didiak sasan sira nee para hetan retornu, para seluk mai lori tan makina foun bele loke servisu ba ema seluk,” Alkatiri enkoraja.
Iha fatin hanesan Koordenador Komisaun Politika Partidu FRETILIN Munisipiu Baukau, Abrão de Oliveira esplika, sosa hand-traktor unidade 20 nee ho valor orsamentu rihun US$ 43 resin, neebe inisiativa mai husi estrutura kuadru partidu FRETILIN nian ba objetivu apoiu fila rai ba komunidade sira neebe prezisa hodi reduz servisu todan agrikultura nian, tanba durante nee maioria servisu sistema fila rai ho manual.
“Ita hatene katak populasaun maioria agrikultor durante nee sira uza konvensional, entaun partidu nee durante atividade barak maibe gasta ba atividade seluk, nunee halo ida nee apoiu sira ajuda rendimentu familia,” katak Abrão.
Nia sublina, hand traktor unidade 20 nee sei abranje iha Munisipiu Baukau laran no tau matan husi movimentu apoiu ekonomia kompostu tekniku profesional agrikultura sira mak sei jere hodi responde ba nesesidade fila rai nian, maibe partidu mos kontinua planu sei haree ekipamentus seluk ba setor agrikultura nian hodi ajuda komunidade agrikultores sira iha Munisipiu Baukau.
Responsavel movimentu apoiu ekonomia, Moises Lobato Perreira katak, preparasaun ekipa nian hodi apoiu fila rai ba komunidade sira neebe prezisa mak sei iha regras ba komunidade sira neebe prezisa, atu nunee haree ekipa movimentu haree ba sustentabilidade ekipamentus nian.
“Tipu fila rai ho metodu neebe ami uza sira sei selu orsamentu kustu natoon para bele sustentabilidade ba ita nia ekipamentus, tanba ita sei hasai mina nomos uza operador,” Moises informa.
Enkuantu fila rai neebe movimentu nee aplika ba komunidade sira neebe prezisa, fila rai maran ba toos nia kada oras selu US$ 6.00.
Entertantu seremonia ofizializa atividade movimentu apoiu ekonomia militante FRETILIN Munisipiu Baukau nee, hetan partisipasaun masimu husi komunidade sira iha Suku Ostiku, Postu Vemasi.
(tom)
