DILI, STLTIMORLESTE.com – Eis Primeiru Ministru atual Sekretariu Jeral Partidu FRETILIN, Mari Alkatiri konsidera Orsamentu Jeral Estadu (OJE) 2025 neebe barak ho montante bilhaun US$ 2.6 foti husi fundu minarai, gasta la tuir dalan sei fo tusan ba jerasaun sira iha futuru.
Kestaun nee Sekretariu Jeral Partidu FRETILIN, Mari Alkatiri hatoo liu husi konferensia imprensa, neebe halao iha salaun CCF, Komoro, Dili, Kinta (07/11/2024).
“Preokupasaun nee laos hau nian mesak deit, sidadaun tomak nian ba sustentabilidade prosesu dezenvolvimentu, ita hotu hatene katak tinan naruk tebes ita nia orsamentu nee foti boot liu ida deit mak fundu minarai, ita foti nee la asumi hanesan osan neebe foti nee hanesan tusan ida ba jerasaun futuru, jerasaun aban bainrua, ita hanoin osan nee mai husi ekonomia produtiva ke bele haburas nafatin, ita gasta osan sira nee hanesan fali osan bolsu nia baibain,” hatete SekJer, Mari.
Maibe nia dehan, transforma tiha Timor Leste hanesan delegandu teknika fiskal hanesan iha lalehan, kuandu moris iha lalehan buat hotu rohan laek osan finanseiru rekursu mos rohan laek tanba sente moris iha lalehan no vida mos rohan laek.
“Ita halo sala boot ita uza osan nee hamate tiha ita nia ekonomia, hamate tiha setor ptidutivu, hamate tiha garantia harii prosesu dezenvolvimentu, haluha tiha atu investe lo-loos iha edukasaun iha formasaun, formasaun ida importante haluha liu ba formasaun de karakter, durante tinan naruk ida nee ita la halo, ita rasik hatudu karakter ladiak, lideransa rasik hatudu karakter mamuk ho valores nee mak akontese ba ita atu tama rai kuak,” dehan nia.
Sekretariu Jeral Partidu FRETILIN nee mos kompara situasaun agora ho rai seluk ho ASEAN ba buat aat sira Timor Leste iha kraik liu, no buat diak mos nafatin iha kraik tanba laiha pozitivu.
Kresimentu ekonomia konsumu rasik boot liu ba produsaun signifika konsumu la ajuda iha kresimentu ekonomiku, komsumu nee ajuda atu hamamuk rekursus, tanba laiha ekonomia ida.
“Ita koalia dala barak ekonomia diversifikada, hotu-hotu koalia kombate probreza, hotu-hotu koalia maibe ita nia orsamentu tinan ba tinan hatudu momos katak ita haluha tiha kauza ida nee atu kombate kiak, ita haluha tiha misaun ida atu kombate kiak,” hatete Sekretariu Jeral Partidu FRETILIN nee.
Tanba tuir Aman Fundador Nasaun nee, orsamentu 2025 despeza boot liu transferensia publika, bens servisu nee mak boot liu, balu kompara ona halo grafiku dehan milhaun US$ 90 despeza rekorentes quatru sentos milhoens mak iha despeza kapital dezenvolvimentu, persentajen hira mak tau ba iha agrikultura, hira mak tau ba edukasaun, hira mak tau ba saude.
Maibe primeiru Governu Konstitusional iha orsamentu trizentos sinquenta milhoens ikus 2005-2006 tinan nee deklaradu ona ano aranka ba dezenvolvimentu, maibe agora tinan 20 resin liu ona mak foin halo aranka ba dezenvolvimentu entaun durante tinan 20 halo saida.
Tinan 20 resin mak koalia orsamentu aranka ba dezenvolvimentu nasional maibe husi orsamentu nee la estruturadu atu bele konvense atu halo aranka ba dezenvolvimentu.
“Ba hau OJE 2025 atu transfere osan publiku ba bolsu privadu, atu kria minoria ida la too tan 6% sai nain ba ekonomia iha Timor Leste nee mak OJE 2025, transferensia osan husi fundu minarai ba ema lubuk ida deit nia bolsu nee mak realidade,” katak Aman Fundador Nasaun nee.
(eme)
