DILI, STLTIMORLESTE.com – Veteranu no faluk oan kiak sira rekonhese governu ida nee halao duni dezenvolvimentu, tanba kuaze estrada iha Dili laran diak hotu, nunee mos ba munisipiu sira estrada balu reabilita ona no balu seidauk hadia.
“Dezenvolvimentu laos la iha liu maibe iha, tanba ami sempre haree husi infrastrutura ezemplu hanesan estrada nasional kuaza atu diak hotu ona, no iha estrada rural sira Ministeriu Obras Publika dadaun ita haree sira kontinua halo intervensaun maski la diak liu, maibe komesa dadauk ona,” dehan Veteranu Marito da Costa ba STL iha Mandarin, Kinta (29/01/2026).
Nia hatutan, durante mandatu governu ida nee iha politika neebe diak selu subsidiu ba veteranu rejistu 2009. Aleinde nee sira seluk hanesan apou familia kbit laek sira laos sira mak husu, maibe tanba estadu iha responsabilidade atu harii uma neebe dignu ba nia povu.
“Hau hanoin ida nee hanesan parte ida neebe ita bele haree, husi progresu serbsiu neebe mak governu ida nee lao atu ba tinan 3,” dehan nia.
Iha parte ketak Akademista UNDIL, Joao Magno hatete, kona- ba dezenvolvimentu iha mandatu governu ida nee populasaun mak sei kolia saida mak governu halo no lae.” Hanesan akademista hau labele kolia katak governu ida halo buat hotu, maibe nee husik povu mak sukat governu nee halo saida durante nee, tanba ita gava dehan governu nee halo ida nee, ida neeba mos ladun diak,” dehan Joao.
(car)
