DILI, STLTIMORLESTE.com – Maromak hadomi ema hotu hanesan, laiha diskriminasaun ba ema ida, tanba nee nafatin tau konfiansa nafatin Jesus.
Tuir Padre Richardo Pasang SVD liu husi nia refleksaun ba loron Tersa (03/02/2026) hatete, loron devosaun loron ohin kona-ba Jesus nia Mizerdikordia.
“Leitura santa ohin nian fo hanoin kona-ba omnipotensia Maromak nian, neebe sempre hadomi ita la ho diskriminasaun,” dehan Padre Richardo Pasang SVD.
Padre dehan, Leitura Evanjelhu Markus 5:21-43 Jesus kura moras rua dala ida, feto ida neebe raan sai durante tinan sanulu-resin-rua no labarik ida neebe ema hanoin katak mate ona.
Padre dehan, istoria rua nee hatudu buat ida neebe hanesan Jesus nia kompaixaun nunka hatene limite sira. Nia kona ema sira neebe la moos, ema sira neebe marjinalizadu no ema sira neebe laiha kbiit, laos deit atu kura sira nia isin maibe mos atu fo fali dignidade no esperansa.
Feto neebe raan fakar durante tinan sanulu-resin-rua, koko ona buat hotu atu bele sai diak, maibe ninia kondisaun sai aat liu tan.
Nia sente ostrasizadu husi sosiedade tanba nia sofrimentu konsidera la moos. Maibe nia iha fiar neebe metin katak Jesus bele kura nia. Ho aten barani, nia kona Jesus nia hena no isin diak kedas.
Entretantu, Jairo, sinagoga nia xefe ida, mai hasoru Jesus ho pedidu urjente tebes, nia oan feto ho tinan sanulu-resin-rua moras todan no besik atu mate.
Jesus ba kedas hamutuk ho Jairo, maibe iha dalan, ema rona katak labarik nee mate ona. Maibe Jesus la hakfodak ho notísia nee no dehan keta tauk, fiar deit.
Toꞌo iha Jairo nia uma, Jesus kaer labarik nia liman nodi naak, “Talita kum”, naak, “Oan, hadeer!” Ida nee milagre ida, labarik nee hamriik no lao.
“Istoria ida nee hanorin ita kona-ba kbiit fiar nian no Jesus nia laran sadia. Feto neebe hetan moras hemorragia iha fiar neebe metin katak Jesus bele kura nia no Jairo mos fiar katak Jesus bele salva ninia oan mane. Ita nia fiar mos bele kona Jesus nia fuan no simu ninia mizerikordia,” katak Padre.
Padre dehan, Jesus nia kompaixaun laos deit ba sira neebe isin diak no forte, maibe mos ba sira neebe fraku no marjinalizadu. Nia kona ema neebe la moos no fo fali sira nia dignidade. Nia mos kura moras fíziku no espiritual.
“Pergunta sira reflesaun nian, oinsa hau bele aumenta hau nia fiar iha Jesus? Dala ruma hau sente marjinalizadu ka la merese Jesus nia mizerikordia? Oinsa hau bele hatudu Jesus nia laran sadia ba ema seluk?
Orasaun: Maromak doben, hau fiar katak Ita-boot bele kura no hadia hau. Hanorin hau atu iha fiar neebe metin no hatudu Ita-boot nia laran-sadia ba ema seluk. Amen,” katak Padre.
(eme)
