Dili, STLTIMORLESTE.com – Iha liturjia Domingu tempu baibain nian ba dala XVIII fo hanoin sarani sira katak, Maromak mak ita nia riku soin lalehan, tanba nee riku soin mundu nian neebe hetan fo tulun ba maluk sira.
Iha omilia Pe. Benediktus esplika, husu ba aan rasik buat hirak neebé hau halo nee nia folin saida ba moris, bainhira hamlaha hamrook habosu ho ai-haan, maibe ita nia klamar sira hamlaha hamriik ba moris rohan laek ita halai ba se, tanba iha moris tomak isin fraku nee fo han hemu, maibe ba klamar mos hamlaha hamrook ba Nai Maromak.
“Ohin rona iha Maromak nia liafuan hatoo ba ita riku soin rua nebee importante, ida mak riku soin mundu nian atu ita bele moris iha mundu nee ho diak, rua riku soin lalehan nian saida mak ita la haree maibe saida mak halo iha mundu ita haree rona kona-ba ita nia riku soin lalehan Jesus Kristu Maromak rasik sai ita nia riku soin, tanba nee riku soin lalehan ita bele simu bainhira ita tau matan ba Nai Maromak nomos ba maluk sira, ita uza riku soin atu bele hetan riku lalehan nian,” hatete Padre Benedictus Nuwa, CMF liu husi omilia wainhira prezide misa iha Igreja Aimutin, Domingu nee (3/08/2025).
Iha omilia amu selebrante esplika, atu hetan riku soin mundu nian servisu makaas ho kosar been atu bele hetan han hemu, maibe riku soin lalehan bele simu bainhira tau matan ba Nai Maromak nomos ba maluk sira, nunee uza riku mundu para bele hetan riku soin lalehan nian, tanba riku soin mundu nian labele hadook aan husi Maromak, se hadook aan husi nee Maromak nee hanoin sala ona.
Tanba nee ema neebe hadomi lo-loos Maromak nuudar nia riku soin, tenke hadomi nia maluk sira, São Joao hatete, ema neebé hadomi Maromak maibe nia la hadomi maluk sira ema nee bosok ten, tanba hirak neebé hadomi uza riku soin neebé iha atu ajuda malu atu sira mos bele moris diak bainhira sira moras terus uza riku soin mundu nian atu tulun mak sira neebe presiza, ida nee mak hetan riku soin lalehan nian.
Basa riku soin lalehan hetan iha moris loron-loron iha Maromak nia oin, bainhira moris lo-loos iha mundu nee servisu makaas la bosok ema bele hetan buat ida nee lo-loos nian, nee nia hetan riku soin mundu Maromak simu.
Ohin Maromak fo hanoin ba ita iha moris rasik, saida mak iha liu husi aiknanoik neebe furak tebes fo hanoin ita katak hau bele iha buat barak, maibe bainhira hau lakon hau nia klamar iha Maromak Nia oin riku soin neebe hau iha laiha folin, Jesus dehan laran makerek kalan nee duni sira kesi hau nia klamar buat hotu neebe o halibur hela ba se los bainhira ita la tau matan ba ita nia klamar,” hatete Pe. Bendiktus.
Iha primeira leitura iha livru Eclesiastika fo hanoin ba sarani sira atu labele lakon diresaun iha moris, tanba dala ruma riku soin mundu nian halo ita lakon diresaun ba Maromak, balun iha haree osan nee haluha Maromak ona, tanba ita iha mundu riku soin mundu nian iha Maromak haluha, hau presiza Maromak wainhira iha moras, maibe agora lae, laos hanesan nee tanba iha buat hotu maibe lakon diresaun ho Maromak lakon nia klamar, se ita diresaun ho Maromak, Maromak hatete uza ita nia riku soin atu bele hetan riku soin lalehan nian.
Maibe pontu importante Maromak Nai Jesus mak hau nia riku soin lo-loos nian, hau hetan buat barak, maibe halo hau hakbesik ba tanba Nia mak hau nia riku soin lo-loos .
(joa)
