DILI, STLTIMORLESTE.com – Maromak nia liafuan mak surik neebe kroat no efetivu, tanba nee ba ema neebe husu liu husi orasaun sei la fila mamuk, maibe sei fo fuan ba moris.
Padre Richardo Pasang SVD ba STL liu husi nia refleksaun Tersa nee (24/02/2026) katak, iha primeira leitura Maromak fo hanoin katak Maromak nia liafuan mak surik neebe kroat no efeitu.
“Maromak fo hanoin mai ita katak Maromak nia liafuan mak surik neebe kroat no efetivu, sei la fila mamuk, maibe sei fo fuan iha ita nia moris. Mai ita rona no halo tuir Maromak nia liafuan ohin loron. Evanjelhu Mateus 6:7-15 konvida ita atu hanoin kona-ba orasaun loos. Jesus hanorin katak orasaun laos konaba liafuan barak, maibe kona-ba fuan neebe loos,” dehan Padre Richardo.
Padre dehan, iha Evanjelhu ohin, Jesus konvida ema hotu halo orasaun no laos orasaun husi liafuan deit maibe tenke ho fuan mos no lo-loos tuir saida mak Nai Maromak hanorin ba nia ema.
“Nai nia orasaun bolu ba perdaun, iha Nai nia orasaun, ita husu perdaun ba Maromak, maibe ita mos iha hanoin atu perdua ema seluk. Perdaun mak forma domin ida neebe aas liu. Se ita la prontu atu perdua, entaun ita sei la simu perdaun husi Maromak,” katak Padre.
Tanba nee Maromak konvida ema atu perdua malu no forma domin neebe aas, nunee bele hetan perdua mos husi Maromak.
“ Pergunta sira atu estabelese Ita prontu atu perdua ema seluk?, Ita husu ona perdaun ba Maromak? Ita sai ona sinal domin Maromak nian iha sosiedade? Orasaun ba taka, Aman, kuda Ita-nia Liafuan iha ami-nia fuan, no forma ami sai ema ida-idak neebe prontu atu perdua ema seluk no lori dame. Amen,” dehan Padre.
Bibi Atan kreda katolik nee hatete pontu Reflesaun sira, Orasaun loos mai hosi fuan neebe moos.Perdua ema seluk mak forma domin neebe aas liu.
“Ita tenke prontu atu perdua ema seluk atu hetan perdaun husi Maromak. Maromak nia Liafuan mak surik neebe kroat no efetivu iha ita-nia moris,” dehan Padre.
Maromak nia liafuan mak kroat no efetivu tanba nee bainhira hasoru problema oin oin iha moris nafatin hakbesik ba Maromak husu liu husi halo orasaun, bainhira husu Maromak sei fo no bainhira tuku odamatan, odamatan sei nakloke.
Ema mos presiza halo refleksaun ba aan, katak presiza muda hahalok aat neebe halo liu ona hodi muda ba hahalok diak, no perdua ema seluk nunee bele simu perdua husi Maromak.
(eme)
