DILI, STLTIMORLESTE.com – Masakre Santa Kruz hanesan movimentu juvenil ida, atu hatutan libertasaun nasional.
“Masakre Santa Kruz movimentu juvenil ida para atu hatutan luta libertasaun nasional, tanba nee mak luta ida nee valor ida neebe motiva valor ida neebe fo espasu ba joven sira, atu hamriik fila fali katak prosesu konstrusaun estadu no nasaun presiza tebes papel joventude sira, atu bele ense no atu bele kontinua, dehan Prezidente Partidu Demokratiku, Mariano Asanami Sabino ba jornalista sira, banhira partisipa iha sesaun plenariu Konselu Politiku Nasional, iha Salaun CNE, Sabadu (09/11/2024).
Nia hatutan, PD fo esperansa boot ba joven sira, imi maka nain ba rai ida nee, imi maka kontinuidade ba esperitu heroi sira nian, luta eroi sira nian, no joven mak kontinuidade lori rai ida nee ba oin.
Nia esplika tan, loron Masakre Santa Kruz 12 Novembru sai hanesan loron ba Juventude Nasional, parabens ba joven sira, selebra loron Nasional triste, tanba joven lubuk ida lakon iha loron 12 Novembru, maibe ao mesmu tempu ita kontente tanba sira inspira atu luta kontinua, sakrifika an hodi bele hetan moris diak ba povu.
Iha fatin ketak, Komunidade Suku Komoro Domingos Mendonsa dehan, loron Masakre Santa kruz sai hanesan loron istoriku ida ba foin sae sira.
Loron nee sai hanesan loron istoriku ba iha Timor oan hotu, liu-liu ba foin sae sira, tanba loron ida nee mak juventude barak fo an ba mate, dehan nia.
Nia hatutan, luta neebe sira halo sai hanesan valor boot ida, tanba nee hanesan jerasaun foun buka hanoin diak tau hamutuk hodi dezenvolve nasaun.
(ter)
