DILI, STLTIMORLESTE.com – Mate isin Koronel Antonio Soares da Silva “Maukalu” too ona Timor Leste (TL), família simu ho matan been.
Mate Isin Koronel Maukalu, neebe halo transladasaun husi Malazia too TL, iha Aeroportu Internasional Nicolao, iha loron Kinta (17/10/2024), ho Aviaun Aero Dili, família sira simu ho matan been, tanba hasoru situasaun neebe moruk hafalun ho nakukun.
Observasaun STL haree katak, mate isin Saudozu Maukalu neebe too iha Aeroportu simu ho Parada Militar.
No simu husi Primeiru Ministru (PM) Interinu, atual Visi Primeiru Ministru Mariano Assanami Sabino, Eis Prezidente Republika, Francisco Guterres Lu Olo, Eis Primeiru Ministru Taur Matan Ruak, Ministru Kombatentes Libertasaun Nasional, Gil Oan Soru, no membru Governu seluk tan.
Enkuantu husi Parlamentu Nasional, Deputadu husi Bankada FRETILIN, David Dias Mandati no seluk tan.
Entretantu mate isin too iha Aeroportu tuku 13:30, neebe tun husi Aviaun, família ho militar no Governu simu hodi taka tais no bandeira Timor Leste iha Kaisaun.
Nunee kontinua tula kedas iha karreta funerariu,
hodi lori kedas ba iha matebian nia uma iha Kintal Boot.
Bainhira husi Aeroportu ba uma, akompanha nafatin husi Militares, Governantes sira inklui Deputadu sira neebe hein mate isin iha Aeroportu.
Família matebian tanis ho lían halerik iha Aeroportu, hodi sadia tanba lakon ona sira nia Aman, Maun, Tiu, no Maun Alin Maukalu.
(gui)
