DILI, STLTIMORLESTE.com – Relasiona ho konfrontu entre joven ho joven iha ambitu komemorasaun Loron Restaurasaun Independensia, deskonfia Membru Polisia Nasional Timor Leste (PNTL) tiru joven Ronaldinho da Costa Ximenes mate, no daudaun nee mate isin iha Mortuariu Hospital Nasional Guido Valadares (HNGV) hodi hein prosesu autópsia.
“Lori matebian mai iha Mortuariu HNGV hodi autópsia, ami hakarak kazu nee ba oin, tanba nee ita autopsia para hatene kartus musan nee mai husi neebe,” hatete matebian nia Aman Carlito da Costa Ximenes ba jornalista sira iha sala Mortuariu HNGV, Kuarta (21/05/2025).
Nia dehan, konfrontu entre joven sira nee akontese dader iha Postu Administrativu Kailaku, Munisipiu Bobonaro, iha ambitu serimonia isár Bandeira selebrasaun aniversariu restaurasaun independensia ba dala 23.
“Ita ba komemora loron importante ida nee, fila lori mate isin mai ospital, laran nee triste tebes, tanba saida mak seguransa la fó samada atensaun maibe tiru mate kedas hau nia oan nee hau la simu, tanba nee prosesu tenke ba oin, atu nunee lei mak tesi se mak los no se mak sala,” nia deklara.
Iha fatin hanesan, Xefe Departamentu Forensik HNGV, Nilton Tilman informa, matebian hodi kalan familia lori mai ona, agora iha hela Mortuariu, hein prosesu autópsia. “Matebian hodi kalan too iha sala Mortuariu HNGV, ita hein halo autopsia,” nia koalia.
Entretantu informasaun neebe STL asesu komemora Loron Restaurasaun Independensia nee iha Munisipiu Bobonaro, Postu Administrativu Kailaku no komunidade husi Suku Walu (8) mak mai partisipa komemorasaun nee mak Suku Meligo, Manapa, Atudara, Raiheu, Da’udo, Goulolo, Genulai no Purugua.
(jen)
