DILI, STLTIMORLESTE.com – Familia hamutuk ho Matebian Saudozu Coronel Costantino Moreira “MAUREGA” mai vizita ikus ba Komando FALINTIL Forsa Defeza Timor Leste (F-FDTL), tanba durante nee nia ativu hela iha Instituisaun F-FDTL too iis kotu.
Xefe Estadu Maior Jeneral F-FDTL, Tenente Jeneral Domingos Raul “Falur Rate Laek” dehan, Instituisaun F-FDTL lakon tan nia ema diak ida, tanba durante nee nia eskola iha rai liur, foin fila mai hodi kontinua nia neebe servisu iha Instituisaun F-FDTL, maibe too ikus nia lakon vida.
“Kuandu ita nia maluk ida mate,.kolega ida no kompanheiru ida halo jornada hamutuk ho ita iha Instituisaun F-FDTL ida nee, ita sente triste no laran susar,” hatete Tenente Jeneral, Domingos Raul “Falur Rate Laek” ba jornalista sira iha Kuartel Jeneral F-FDTL Fatuhada, Dili, Kuarta nee (23/04/2025).
Nia tenik, Instituisaun F-FDTL nia preokupasaun ida mak sira nee hetan formasaun barak no servisu makaas atu mai serve Instituisaun F-FDTL ida nee, maibe ohin loron nia lakon vida.
“Atu mai ajuda hau para profisionaliza no moderniza maibe mate fali, neebe hau mos sente triste tebes tanba lakon ema diak ida,” nia deklara.
Nia informa, Saudozu daudaun nee kontinua asumi knaar nuudar Xefe Divizaun Planeamentu iha Quartel Gereral ate Saudozu hetan atakasaun Cardioca.
“Nia ema figura diak, tanba nia hetan formasaun iha Australia, Portugal, Indonézia, iha nee ita haree nia hetan formasaun barak, maibé ikus nia mate,” nia hatutan.
Nia dehan, durante nee sira sempre halo check-up ba saúde, maibe matebian Coronel Costantino Moreira ikus nee la halo Check-Up ba nia saude, tanba nee problema iha kurasaun.
Maibe matebian nia subsídiu iha ona lei lori ona ba Konselhu Ministru no aprova ona para asistensia kontinua ba ninia familia sira tuir legalidade neebe mak iha.
Entretantu Matebian Coronel Costantino Moreira “MAUREGA” moris iha Baukau, Kelikai, Waitame iha loron 05 fulan Dezembru tinan 1977 no matebian Koronel Costantino Moreira oan husi Martinho Moreira no Inan Sabina Moreira, sira iha maun alin hamutuk nain 4, matebian oan segundu husi feto rua no mane rua.
Saudozu husik hela fen ho oan feto nain tolu no ida sei iha nia mama nia kanotak. Matebian moras atakasaun Cardioca ho komplikadu, oras nee matebian halao nia knaar hanesan baibain, derepente matebian monu iha servisu fatin ho kondisaun grave.
(jen)
