DILI, STLTIMORLESTE.com – Matebian Maria Olandina Isabel Caeiro Alves nia kontribuisaun makaas ba luta libertasaun patria, liu-liu ba direitu umanu no direitu feto.
Lia hirak nee hatoo husi eis Prezidente Rede Feto, Judite Dias Ximenes ba STL iha nia knaar fatin Kaikoli, Tersa (01/04/2025).
“Ita hotu moris ikus, maibe mana Caeoro nia luta nee hahu iha 1974 bainhira FRETILIN hamriik no bainhira 1975 harii OPMT, no iha tempu neeba okupasaun matebian hanesan feto neebe barani duni no iha espiritu hamutuk ho mane maluk sira luta makaas hakarak duni atu Timor hetan ukun rasik aan nomos kontra invasaun Indonezia durante 24 anos nia laran,” dehan Judite Dias.
Nia hatete, bainhira Timor hetan ona indepedensia matebian mos loke organizasaun oinsa atu kontribui ba dezenvolvimentu Timor Leste, nunee mos sai fundador ba Rede Feto Timor Leste no halo servisu hanesan ema diplomata hodi defende Timor iha mundu internasional.
“Nia laos luta ba direitu feto deit, maibe luta ba direitus umanus tanba kontribui makaas mos ba luta ukun rasik aan, signifika katak luta ba direitus umanus, tanba nee laos luta ba direitus umanus deit maibe luta ba direitus feto,” katak nia.
Nunee mos Prezidente Rede Feto Timor Leste, Zelia Fernandes ho ekipa lori Rede Feto nia naran hatoo sentidu kondolensia ba maktoban Olandina Caeiro, estimada, ativista, figura iha luta ba Indepedensia promosaun igualdade jeneru no fundador Rede Feto Timor Leste.
“Ninia forsa firmeza no dedikasaun husik hela legadu laen ba feto Timoroan sira nia luta Rede Feto Timor Leste, no nasaun tanis ba lakon eroina ida hodi selu ondra no gloria deskansa ho hakmatek iha mansaun selestian,” dehan nia.
Matebian Maria Olandina Isabel Caeiro Alves, moris iha loron 20 fulan Marsu tinan 1956 iha Ermera, Timor-portuges nuudar diplomata, emprezaria, funsionariu publiku no ativista direitu feto Timoroan nian.
Iha tinan 1975 nuudar unika feto neebe servisu iha transmisaun Radio Maubere. Iha fulan Dezembru tinan 1975, militar Indonezia sira kaptura nia no lori ba dadur iha Kupang. Iha neeba mak nia hahoris nia oan mane no nunka hasoru malu fila-fali nia laen neebe kaer hela kilat iha ai-laran.
Olandina Caeiro sai husi prizaun iha tinan 1979, maibe nafatin hetan kastigu no tortura husi militar Indonezia. Hafoin nee, nia servisu nuudar funsionariu publiku durante periodu administrasaun Indonezia nian iha Baucau too tinan 1989.
Saudoza nafatin dedika nia aan ba servisu klandestina nian too hetan detensaun iha tinan 1992. Hafoin detensaun, nia lakon servisu nuudar funsionariu publiku no hahu loke restaurante iha Dili.
Husi tinan 1997 too 1999, Olandina Caeiro nuudar membru DPRD no hetan nomeasaun hanesan membru Komisaun Indonezia nian ba luta Halakon Violensia hasoru Feto iha tinan 1998. Saudoza hanesan ko-fundadora no prezidente husi organizasaun East Timorese Women Against Violence (ETWAVE, uluk Liu hanaran GERTAK, iha loron 25 fulan Novembru tinan 1998, Saudoza organiza manifestasaun kona-ba violensia hasoru feto Timor. Molok referendu iha tinan 1999, Saudoza partisipa kampanha door to door hodi fahe informasaun kona-ba ukun rasik aan. Hafoin nee, bainhira milisia pro integrasaun halo violensia oin-oin iha Dili, Saudoza evakua ba Portugal, Lisboa, liu husi Jakarta no halo atividade lubuk seluk tan.
(eme)
