DILI, STLTIMORLESTE.com – Materia neebe estudantes husi Eskola Sekundariu Jeral nu. 4 Setembru Balide halao tiha ona ezame primeiru periodu, tanba nee materia sanolu mak profesor halo ona korresaun, hein prienxe iha kaderneta.
Diretor Eskola Sekundariu Jeral nu. 4 Setembru Balide, Sergio A.da Cruz hatoo lia hirak nee ba jornalista STL iha nia knaar fatin Balide, Segunda nee (21/04/2025).
“Kona-ba koreksaun materia ezame primeiru periodu nian, ami nian profesores balun hatama ona, fahe ba ami nian profesor sira, atu nunee bele prienxe ba iha kaderneta estudantes idak-idak nian. Ami nian materia besik too sanolu ona mak ami halo korresaun, iha momentu bainhira ezame nee hotu, se nian materia mak ezame hotu ona bele lori ba uma para bele halo koreksaun daudaun ona,” dehan nia.
Sergio afirma, materia sanolu mak remata ona koreksaun no profesor kada materia entrega ona ba eskola, nunee hein prienxe ba iha kaderneta estudantes idak-idak nian, sira total materia hamutuk sanolu resin tolu, agora sanolu mak halo ona koreksaun no hela tolu mak seidauk.
Iha fatin seluk, Diretor Eskola Sekundariu Nobel da Paz, Jeremias P.de Jesus hatete, hafoin realiza ezame primeiru periodu, profesores ba kada materia halo koreksaun, bainhira remata korresaun bele prienxe iha estudantes sira nian kaderneta.
“Hau hanoin hafoin realiza ezame primeiru periodu, profesores ba kada materia halo korresaun, bainhira remata korresaun bele prienxe iha estudantes sira nian kaderneta, tanba agora ami sei feriadu hela,” katak nia.
(jac)
