BAUKAU, STLTIMORLESTE.com – Material konstrusaun neebe Ministeriu Solidariedade Sosial no Inkluzaun (MSSI) apoiu ba Suku Laisorulai de Cima, iha Postu Administrativu Matebian, atu reabilita uma sentru komunitariu la sufisiente.
Sekretaria Suku Laisorulai de Cima, Adelina Xavier Soares Tilman hateten, hafoin remata atividade, MSSI fahe ai-haan komplementar ba benefisiariu sira iha Postu Administrativu Matebian, Autoridade Suku Laisorulai de Cima aprezenta preokupasaun kona-ba uma sentru komunitariu Suku Laisorulai de Cima neebe daudaun kondisaun aat, nunee Ministra Solidariedade Sosial no Inkluzaun orienta kedas parte enjinheiru halo levantamentu dadus ba uma refere no konsege hetan ona apoiu material konstrusaun hanesan kalen uma tahan 130, sementi saku 40 inklui jinku balun ba objetivu atu reabilita hikas uma sentru komunitariu iha Suku Laisorulai de Cima, tanba daudaun kondisaun aat, maibe apoiu refere la sufisiente, tanba uma medida boot neebe la bele responde husi kalen uma tahan 130 no sasan seluk neebe MSSI fo apoiu.
“Hodi bainhira distribui ona sasan balun mai ami nia Suku, sementi 40 saka hamutuk ho kalen mai ona, maibe tuir ami nia preokupasaun sasan hirak nee la too, ami nia preokupasaun mak hakarak aumenta sasan sira nee para konstrui fila fali ami nia uma ida nee, tanba uma nee importante,” hateten Adelina ba jornalista sira iha Laisorulai de Cima, Kuarta (16/07/2025).
Sekretariu nee informa, uma sentru komunitariu Suku Laisorulai de Cima konstrui iha tinan 2010 husi parseiru dezenvolvimentu CRS no too iha tinan 2025 kondisaun hahu aat, maibe parte Suku laiha finanseiru atu halo reabilitasaun.
Adelina konsidera, kondisaun uma sentru komunitariu refere fo ameasa ba ema nia vida, tanba kalen sira neebe taka hahu feruzin no ai grabat sira hahu dodok, maibe nafatin utiliza bainhira atividade husi Nasional, Munisipiu no Postu nian realiza iha Suku Laisorulai de Cima no Laisorulai de Baixo, tanba laiha salaun no fatin seluk atu utiliza serimonia importante sira.
Nunee husu apoiu ba MSSI no konsege hetan apoiu material konstrusaun balun, maibe material hirak neebe apoiu ona la sufisiente, tanba nee kontinua husu MSSI atu aumenta material liu liu kalen no seluk tan hodi utiliza ba reabilitasaun sai fatin dignu no utiliza ba atividade no serimónia seluk sente seguru.
Enkuantu liga asuntu nee, STL tenta konfirma Diretor Sentru Solidariedade Sosial Munisipiu Baukau, Clementino Sarmento, maibe la fo komentariu, tanba apoiu refere direita husi Nasional la liu husi Sentru Solidariedade Sosial Munisipiu Baukau.
Entretantu Suku Laisorulai de Cima rejistu total populasaun hamutuk 1.400 husi Xefe Familia 343 iha Aldeia Batikasa, Uaidaba no Uataliu.
(tom)
