BAUKAU, STLTIMORLESTE.com – Eis Komandante Polisia Munisipiu Baukau, Superintendente Xefe Polisia Antoninho Mauluta konsege rai tongkat Komandante Munisipiu nian iha Baukau.
Deklarasaun nee hatoo husi Eis Komandante Komando Polisia Munisipiu Baukau, Superintendente Xefe Antoninho Mauluta iha serimonia entrega servisu Komando Polisia Baukau nian ba Komandante foun, neebe realiza iha edifisiu Komando Munisipiu Baukau, Kinta (17/10/2024).
“Agradese ba Komando Jeral, ohin loron iha Baukau tongkat neebe hau kaer durante atu tama 20 anos hau rai,” nia dehan liu husi diskursu.
Mauluta agradese ba Komandante Jeral Polisia Nasional Timor Leste neebe inisiu 2005 nomeia nia sai Komandante Munisipiu hahu husi Munisipiu Bobobaro durante tinan 7, Aileu tinan 2 resin, Kovalima tinan 5 no termina kontinua iha Komando Munisipiu Vikeke.
Bainhira lidera Komando Munisipiu Vikeke hetan hikas despaisu hodi fila ba Bobonaro no kontinua ba iha Komando Polisia Munisipiu Baukau iha loron 23 Agostu 2023.
“Ordem neebe mai nee atu lori hau ba fali servisu iha fatin seluk, ohin tempu ikus ba hau iha Baukau,” espresa Maulata.
Eis Komandante Munisipiu Baukau nee haktuir, hafoin hetan orientasi husi Komando Jeral lidera Komando Polisia Munisipiu Baukau hasoru kedas situasaun balun, maibe konsege rezolve, tanba kooperasaun diak husi parte hotu inklui membru sira iha komando Munisipal.
Mauluta husu membru PNTL hotu iha Baukau atu hamutuk ho Komandante foun hodi asegura estabilidade ba dezenvolvimentu Munisipiu nian, tanba susesu hotu Komadante Munisipiu too nasional, esforsu husi membru sira asegura kualker situasaun iha terenu.
Iha fatin hanesan, Komandante Komando Polisia Munisipiu Baukau, Superintendente Xefe Polisia Antonio Maria De Sa akresenta, garante dezenvolvimentu atu lao diak iha Munisipiu Baukau presiza kooperasaun ho entidades hotu.
Komandante foun nee argumenta, hakarak Baukau lao ba oin, hanesan Komandante Munisipiu prioriza mak atu asegura seguransa no garante povu nia vida iha kualker situasaun, tanba lidera ho moto zero toleransia ba krime hotu.
“Hau ema mate restu ida hateten, inimigu ba tiha ona, laiha tan inimigu seluk iha rai laran, buat ida krime lao iha nia dalan, krime tenke hasoru lei,” nia hateten.
De Sa sublina, pasta Komando Polisia Munisipiu nian nee responsabilidade, tenke servisu tuir lei, bainhira mosu situasaun halo atuasaun no prosesu tuir lei neebe vigora.
(EST 2)
