DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu inisial JC hanesan maun, neebe sona mate nia alin David.
Tuir akuzasaun neebe iha katak, kazu nee akontese iha loron 26 Abril 2023 iha Aileu, bainhira arguidu JC fila husi servisu fatin haree katak, nia alin matebian David halo barulhu hela iha sira hela fatin.
Momentu neeba arguidu JC ba hakalma nia alin nee, tanba nia hahalok pertuba ema nia deskansa iha tempu kalan.
Maibe arguidu nia alin David la rona no kontinua halo barulhu, no arguidu ba fo hateten dala ida tan, maibe arguidu nia alin kontinua la rona.
Nunee iha momentu neeba matebian David tama ba uma laran hodi kontinua halo barulhu hodi hakilar ba arguidu nia feen. Nunee arguidu iha kuartu laran sai mai hodi hakalma, maibe argudu nia maun alin sira lamenta no hamutuk ho matebian ba baku lisuk fali arguidu JC too arguidu monu ba rai.
Bainhira arguidu JC latan tiha iha rai, arguidu nia alin David kontinua fila ba arguidu nia feen hodi kontinua halo asaun agresaun fiziku hasoru arguidu nia feen, too arguidu nia feen hetan pankada.
Laos too nee deit, maibe matebian David fila ba nia maun arguidu JB hodi foti besi kanu ida baku arguidu maibe la konsege mate, tanba arguidu nia iis iha fali, nunee arguidu hamriik ba foti tudik hodi sona dala rua iha matebian David nia kabun parte loos, nunee rezulta David monu ba rai.
Liu deit minutu balun familia sira seluk neebe lori David ba halo tratamentu iha hospital no argudu JC nia ferik oan ba bolu polisia eskuadra Dom Aleixo hodi lori arguidu ba eskuadra polísia Dom Aleixo hodi submete ba investigsaun.
Konsekuensia husi arguidu nia hahalok nee rezulta vitima mate. Tanba nee Ministeriu Publiku akuza arguidu komete krimi omisidiu.
Iha sala julgamentu laran arguidu nia feen kaben CS fo nia depoimentu katak, momentu neeba arguidu JB ho David nuudar maun alin rasik, durante nee sira hela iha uma ida no la iha problema, dala ruma mak iha problema sira rezolve kedan.
Sasin deklara, momentu neeba iha kalan ida bainhira nia laen sai husi servisu nia haree nia alin David (matebian ona) hakilar ba mai nunee, nia hakalma tanba dehan kalan ona labele hanesan nee pertuba ema nia deskansa.
Sasin deklara tan, bainhira arguidu tama ba uma laran toba ona, arguidu JC nia alin David tama tuir ba uma laran hodi koalia lian boot ba arguidu nia feen, nunee arguidu sai mai koalia netik, maibe matebian David rona no halo fali agresaun hasoru arguidu hodi tuda nia maun ho bikan too bikan nee fera iha nia oin laran.
Nunee komesa mosu diskusaun too maun alin sira seluk hamutuk baku lisuk sasin nia laen monu ba rai, no David foti besi kanu atu fai ba arguidu, maibe la konsege tanba nia prima mak foti tiha besik kanu iha nia liman hodi hateten imi mesak maun alin rasiklabele halo ida nee.
Sasin deklara tan, matebian David la rona kontnua halo asaun too arguidu hader mai foti tudik defende aan hodi sona ba matebian nia kabun, no matebian halo tratamentu liu tiha semana rua mak foin husik iis.
Rona tiha sasin, iha alegasaun Ministeriu Publiku neebe reprezenta husi Prokurador Luis Hernani Rangel iha nia alegasaun husu ba Tribunal atu aplika pena unika prizaun tinan 15, tanba arguidu JC nia hahalok prienxe ba elementu krimi omisidiu agravadu.
Prokurador deklara, Ministeriu Publiku konsidera asaun neebe arguidu JC halo hodi oho nia alin David nee laiha liu lejitimidade defeza neebe previstu iha artigu 48 no 49 husi Kodigu Penal Timor Leste.
Tanba momentu neeba arguidu uza tudik enkuantu matebian nia alin David uza besi, haree husi sirkuntansia sira nee mak arguidu nia asaun nee laiha lejitimu defeza.
Enkuantu Defeza husi arguidu JC, Defensor Publiku Henrique Mariz deklara, relativamente krimi omisidiu agravadu neebe Ministeriu Publiku imputa ba arguidu JC la prienxe krimi omesidiu agravadu, tanba arguidu momentu neeba halo asaun hodi sona matebian David nee la ho intensaun.
Defeza deklara, momentu neeba arguidu fo hanoin ba iha matebian katak labele hakilar ho lian makaas tanba kalan ona, tanba matebian nia asaun nee perturba ema deskansa.
Defeza konsidera arguidu halo asaun nee laos ho intensaun, tanba ne Defeza husu atu Tribunal atu halo alterasaun kualifikasaun Juridiku ba krimi omisidiu agravadu neebe Ministeriu Publiku akuza ba fali krimi ofensas integridade fízika grave.
No husu Tribunal atu aplika kastigu tuir krimi Ofensa Integridade Fizika Grave nian.
Rona tiha alegasaun, Tribunal halo adiamentu kazu nee ba loron 3 fulan Julhu 2025, oras tuku 17:00, hodi rona desizaun.
Audiensia julgamentu nee prezide husi Juiz koletivu Afonso Carmona, Maria Solana no Juiza Albertina Neves, MP reprezenta husi Prokurador Luis Hernani Rangel, no arguidu hetan asistensia legal husi Henrique Mariz.
(ter)
