DILI, STLTIMORLESTE.com – Ministru Defeza (MD) Kontra Almirante Donaciano Costa Gomes “Pedro Klamar Fuik” hateten, Governu Timor Leste liu husi MD hatoo nia protidaun hakarak halo kooperasaun ho Governu Brunei Darussalam iha área Defeza Militár.
Tanba nee, iha kinta (21/8) ohin halao enkontru bilaterál ho nia omologu Ministru Defeza Brunei Awang Halbi bin Haji Mohd Yussof halo vizita mai Ministeriu Defeza neebe mak akompanha ho Xefe Estadu Maiór Jenerál Forsa Armada Brunei nian Muhammad Haszaimi bin Bol Hassan hafoin partisipa tinan 50 aniversariu FALINTIL nian Tasi-Tolu.
“Iha okaziaun ida nee, hau lori IX Governu Konstitusional nia naran agradese ba hau nia kolega Ministru Defeza husi Brunei,.hamutuk ho Xefe Estadu Maiór Jenerál Forsa Armada Brunei nian neebe mak partisipa iha ita nia serimónia,” hatete Ministru Defeza (MD) Kontra Almirante Donaciano Costa Gomes “Pedro Klamar Fuik” ba jornalista sira hafoin hasoru malu ho Ministru Defeza Brunei no Xefe Estadu Maiór Jenerál Forsa Armada Brunei iha Ministeriu Defeza Fatuhada, Kinta nee (21/08/2025).
Nia dehan, vizita Ministru Defeza Brunei no Xefe Estadu Maiór Jenerál Forsa Armada Brunei nee nuudar vizita kontinuasaun neebe mak halo husi Sultan Hassanal Bolkiah foin daudaun nee hodi fortifika relasaun bilaterál Timor Leste ho Brunei.
“Hanesan ita boot sira hatene katak Brunei Darussalam sempre iha apoia solidariedade hamutuk ho ita. Ita nia líder sira konhese mos majesrade (liurai) neebe mak mai vizita ona ita-nia ra no sira (Ministru Defeza Brunei) iha oportunidade ida ne’e mai vizita ita para atu partisipa mós iha ita nia festa,” nia esplika.
Governante nee dehan, husi vizita nee Timor Leste hatoo nia protidaun hakarak servisu hamutuk ho Brunei iha dominu defeza no militár.
“Hasoru malu ida nee nudar primeiru kontaktu ida entre Timor Leste ho Brunei husi ema ho ema mak depois sei haree. Hakat ida ho fali hakat seluk, labele halai labele haksoit, kuandu nunee bele monu.Tanba ida ne’e mak vizita ida nee importante tebes-tebes ba ita nian relasaun,” nia deklara.
Iha fatin hanesan, Ministru Defezs Burnei Darussalam Awang Halbi bin Haji Mohd Yussof nia agradesimentu ba Ministru Defeza Donaciano Costa Gomes Pedro Klamar Fuik ne’ebé simu nia ho delegasaun diak tebes.
“Hau hatoo hau nia obrigadu ba iha oportunidade ida nee ba iha Exelensia Ministru Defeza Timor Leste ba atendimentu ospitalidade neebe diak tebes-tebes durante hau ho ami nia delegasaun nian estadia iha Timor Leste,” nia informa.
Nia hatutan, nuudar Ministru Defeza Brunei hodi mai partisipa iha komemorasaun loron FALINTIL ba dala-50 nee uudar nian vizita dahuluk.
“Ida nee nuudar memoria ba ami no ida nee hanesan hau nia vizita dahuluk mai iha nee ho hau nia delegasaun sira. No momentu ida nee sai hanesan testemunha hodi haforte diak liu relasaun bilaterál nasaun Brunei no Timor Leste. Nunee mos hametin relasaun bilaterál entre Ministru Defeza Brunei no Ministru Defeza Timor Leste, hau fiar katak ba oin ita sei hasoru malu fila fali obrigadu,” nia afirma.
(jen)
