DILI, STLTIMORLESTE.com – Ministru Defeza (MD), Donaciano da Costa Gomes ‘Pedro Klamar Fuik’ la fo komentariu ba kazu ema deskonhesidu tiru rezidensia eis Prezidente Republika (PR), Francisco Guterres Lú Olo nian, tanba sei iha prosesu investigasaun nia laran.
“Hau labele fo komentariu, tanba ita nia Polisia Nasional Timor Leste (PNTL) sei halo hela investigasaun,” hatete Ministru Defeza, Donaciano da Costa Gomes ‘Pedro Klamar Fuik’, ba jornalista sira iha Resintu Kuartel Jeral F-FDTL, Fatuhada, Dili, Kinta (09/1/2025).
Nia dehan, PNTL sei halo investigasaun ba kazu nee, kona-ba ema deskonhesidu tiru rezidensia eis Prezidente Republika, Francisco Guterres Lú Olo nian nee intensionadu ka la intensionadu.
Maibe PNTL halo ona ivestigasaun no analiza ba iha kilat musan, depois mak foin hatene tiru nee husi neebe, no tipu kilat neebe ema deskonhesidu nee uza.
Antes nee Xefe Departamentu Investigasaun Kriminal, Polisia Nasional Timor Leste (PNTL), Superintendente João Belo dos Reis hatete, situasan neebe akontese iha 1 Janeiru 2025, tuku 1:30 madrugada, wanhira komunidade tiru fogetes no ema deskonhesidu mos tiru kilat, no kilat musan monu iha eis Prezidente Republika TImor Leste, Francisco Guterres nia uma.
“Iha akontesimentu nee ekipa Investigasaun Kriminal Nasional hamutuk ho Ekipa Forensik nian identifika katak, kilat musan nee monu duni iha neeba, ita hatene kilat musan nee mos monu duni iha neeba, depois ita hatene katak nee rejulta tiru ba leten, kilat musan neebe monu 9 mil metru, ita seidauk hatene ida nee mai husi kilat tipu ida neebe, mais ita hatene ona katak nee kilat kiik, tanba 9 mil metru,” dehan nia.
(jen)
