DILI, STLTIMORLESTE.com – Ministra Edukasaun (ME), Dulce de Jesus Soares agradese ba Governu Portugal neebe mak fo apoiu hodi reabilita sala aprendizajen Eskola Baziku Central (EBC) Farol no ohin halo inaugurasaun.
“Ohin loraik ME hamutuk ho Embaixadór Portugal, ami mai halo inagurasaun ba apoiu neebe mak governu Português fo mai iha Eskola Farol nee. Neebe mak ita hotu hatene katak, eskola Farol eskola antiga ida, eskola neebe konesidu desde português nia tempu. Iha Indonesia nia tempu depois agora ho nia numeru estudantes rihun 2 resin. Ohin ita hetan apoiu ida, ita agradese tebes ba governu Portugal neebe mak fo apoiu rehabilita sala 8, sala Profesor no Diretora tau vintunias no eletrisidade neebe kapas tebes, atu bele ajuda estudantes sira iha prosesu aprendizajen bele lao ho diak liu tan,” dehan Ministra Dulce ba jornalista iha EBC Farol, Segunda (10/11/2025).
Governante nee dehan, apoiu ida nee liu husi Embaixada Portugal iha Timor Leste, tanba nee agradese simu apoiu sira nee ho diak tebe-tebes. ME servisu hamutuk ho parseiru dezenvolvimentu inklui ho embaixada sira hotu.
Nia hatutan, haree ba parede neebe pinta mos, pelumenus labarik sira labele pinta no halo foer parede sira nee, maibe tenke halo mos.
Embaixada Portugal iha TL fo apoiu ba edukasaun boot teb-tebes, ida iha eskola Portuguesa neebe mak Timor oan barak iha neeba, depois liu husi eskola Café nee iha rihun 10 resin estudantes neebe mak por ano iha 150 professores neebe mak mai hanorin iha Eskola Cafe.
Jornalista: Jacinta Sequeira
Editora: Domingas Gomes
