DILI, STLTIMORLESTE.com – Ministeriu Edukasaun (ME) alerta ona ba Diretor Edukasaun Munisipiu sira hotu atu tau atensaun ba implementasaun programa merenda eskolar iha eskola idak-idak.
Liafuan nee haktuir husi Xefi Departamentu Programa Merenda Eskolar iha ME, Belchior Maria Almeida ba STL, Kinta (18/09/2025).
Nia dehan, husu ba Diretor Munisipiu hotu-hotu, para atu fo informasaun nee ba inspektor eskolar sira, atu fahe informasaun nee ba kuzineira sira atu haree didiak, bainhira atu sosa manu tolun, no hahan sira neebe maka hola iha loja sira.
“Hau koalia ona ho Diretor Munisipiu hotu-hotu, hau husu sira para atu fo informasaun nee ba ita nian inspektor eskolar sira hodi fahe informasaun nee ba kuzineira sira, tu haree didiak, bainhira atu sosa manu tolun no hahan sira neebe mak hola iha loja nee kuidadu teb-tebes, tanba informasaun katak,manu tolun ida plastik ou ema halo nee barak,” nia dehan.
Nia salienta, agora dadaun inspektor eskolar sira fahe hela informasaun nee ba eskola sira, nomos ba EJP sira atu kuidadu ho situasaun sira nee. Sosa manu tolun karik tenke husu didiak, nee foin akontese. Ho nunee bele alerta ba ema hotu-hotu toma responsabilidade.
“Ohin hau tau ona iha ami nian grupu nee, husu direjente Diretor Edukasaun Munisipiu sira hotu, atu oinsa sira kordena ho parte saude ninia, atu bele haree didiak kontrola situasaun sira nee. Agora hau mos prepara hela karta ida, hau nia Direitor jeral asina, para atu manda ba Aifaesa hodi bele kontrola situasaun sira hanesan nee,” katak nia.
Nia halo komparasaun situasaun iha Dili la hanesan ho iha foho, tanba sira telefoni ba ema sira neebe mak lori manu tolun ba ho kareta sira sosa deit. Bainhira sira sona ou daan ba labarik sira han, bainhira han hotu sira la hetan buat ida. Fila uma too loraik mak foin oin halai no muta, hodi lori kedas ba hospital halo observasaun tau soru, nain rua hodi kalan fila kedas,no rua seluk ohin dader foin fila.
Jornalista: Jacinta Sequeira
Editora: Domingas Gomes
