DILI, STLTIMORLESTE.com – Ministeriu Edukasaun (ME) apela ba eskola sekundariu sira neebe mak ezekuta ona konsesaun eskolar, tenke hatama relatóriu mai Ministériu. Bainhira la hatama, konsekuensia mak sira la hetan konsesaun iha faze tuir mai.
Diretor Nasional Ensinu Sekundariu iha ME, Benjamin Gomes da Cruz Fernandes dehan, husu ba eskola sira atu hatama relatoriu mai ME.
“Atu informa ba ita boot sira katak, konsesaun eskolar nee trimestre rua mak ami fo ona ba eskola inklui Eskola FINANTIL. Eskola halo ezekusaun hotu ona, relatóriu neebe mak tama, Munisipiu Ermera nian tama hotu ona, Manufahi, Manatuto, munisipiu balun mak seidauk hatama. Loron neebe ami fo ultimatu ba sira too deit 20 Agostu, katak molok dia 20 sira tenke hatama hotu ona, atu nunee ita bele prepara fali ba trimestre rua tuir mai,” esplika nia ba jornalista sira iha Eskola Sekundariu Jeral FINANTIL, Tersa (12/08/2025).
Nia dehan, ezame nasional sei halao iha loron 20 Outubru tinan nee, tanba ne sura deit fulan. Nee duni husu ba eskola sira molok dia 20, sira tenke hatama hotu ona relatóriu, se la hatama, ninia konsekuensia mak sira labele hetan tan konsesaun, nee duni sira tenke esforsu aan para hatama relatóriu.
(jac)
