DILI, STLTIMORLESTE.com – Ministeriu Edukasaun (ME) fo apoiu makina arte grafika ba Eskola Sekundariu Tekniku Vokasional 28 de Novembru Bekora.
“Ohin ami nain hira mai lori hela ekipamentus arte grafika nian, neebe tuir rezultadu iha fulan hirak ba kotuk ami mai observa hela situasaun iha eskola ida nee, sira iha makina kiik oan ida mak sira halo operasaun hodi halao pratika ba labarik sira, tanba nee mak ita tau orsamentu iha tinan 2024 nian, ita sosa makina nee ho nia medida neebe mak boot, nunee fasil liu tan profesor sira halo labarik sira pratika. Laos ida nee deit, ami mos lori projetor nomos ekipamentus eletrisidade nian, ho objetivu politika neebe ita iha bele halo dijitalizasaun ba Eskola Tekvo, liu-liu ensinu sekundariu, tanba nee ita hahu ona,” dehan Sekretariu Estadu Ensinu Sekundariu Jeral no Ensinu Tekniku Vokasional, Domingos Lopes Lemos ba jornalista sira iha Eskola Sekundariu Tekvo 28 de Novembru Bekora, Segunda nee (05/05/2025).
Nia dehan, ME iha ona planu fo ekipamentus ba eskola sira, nunee halo dijitalizasaun ba iha prosesu de ensinu aprendizajen, sosa ekipamentus nee pakote ida, hanesan ekipamentus arte grafika nian nomos projetor sanolu resin hanesan nee, ho ninia montante orsamentu $41 mil.
“Iha tempu badak ita sei fo tan ba eskola sira seluk, projetor neebe mak tuir planu ita iha tiha ona, ho nia rezultadu neebe durante nee sira uza makina kiik oan no sira bele produs ona emblema sira iha nee, nee tuir rezultadu neebe mak ita nian estudantes sira produs emblema uza makina neebe kiik, espera ho makina neebe boot sira bele produs saida mak tuir ita nian hakarak. Ita nian planu orsamentu ba 2025 nee maioria Eskola Tekvo ita sei distribusi komputador no projetor,” nia afirma.
Nunee mos Diretor Eskola Tekniku Vokasional 28 de Novembru, Tomas Pinto dehan, durante nee estudantes sira uza makina kiik mak halo pratika, maibe ho makina boot ida nee eskola bele produs rasik emblema no labele gasta ona osan ba iha fatin seluk, apoiu makina boot ba arte grafika ninia.
“Ami orgulhu no agradese tebes, tanba iha ekipamentus neebe kleur tebes foin too iha tinan rua tuir malu tinan kotuk, sasan husi eletrisidade ninia, maibe ohin nee arte grafika ninia, makina ida nee boot tebes ba iha estudantes departamentu arte grafika ninia,” tenik nia.
(jac)
