DILI, STLTIMORLESTE.com – Ministeriu Edukasaun (ME) liu husi Diresaun Nasional Edukasaun Inkluzivu Asaun Sosial Eskolar (DNEIASE) fo apoiu material emerjensia ba eskola 5 neebe hetan estragus husi anin boot.
Diretor Nasional Edukasaun Inkluzivu Asaun Sosial Eskolar, Fernando Soares dehan, foin dadaun simu pedidu husi Munisipiu Bobonaro, eskola 2 nee nibel ensinu baziku. Munisipiu Ainaro eskola 1 no Vikeke 2.
“Foin dadaun nee ami distribui ona material apoiu emerjensia nian ba ita nian eskola 5, husi Munisipiu Bobonaro nian eskola 2, Ainaro 1 no husi Munisipiu Viqueque nian 2. Nee ita foin apoiu iha anin boot ida akontese iha fulan hirak liu ba nee,” katak nia ba STL, Tersa (16/09/2025).
Nia afirma, apoiu material emerjensia ba eskola neebe hetan estragus husi anin nee mak hanesan, husi diresaun ida nee fo apoiu kalen, besi ni pregu, nee distribui ona iha fulan hirak liu ba,balun halao iha Julhu no Agostu tinan ida nee nian laran.
“Agora eskola balun neebe mak proposta foin tama mai nee,nee ita seidauk fo apoiu,tanba material seidauk iha. Dala ruma tinan oin mak ita fo apoiu material emerjensia ba sira. Pedidu ida foun nee ninia tipu estragus nee la hanesan balun grave, maibe ita aei halo verifikasaun nee duni verifikasaun hotu mak ita sei haree lolos ninia tipu estragus nee,” nia haktuir.
Nia akresenta, tanba ho espriensia neebe iha nee, balun kalen tahan ida rua deit, maibe ida nee eskola sira bele uza konsesaun eskolar nee. Ida neebe tipu estragus grave nee tenke halo verifikasaun.
Jornalista: Jacinta Sequeira
Editora: Domingas Gomes
