DILI, STLTIMORLESTE.com – Ministeriu Edukasaun (ME) iha semana kotuk halao asina akordu ho eskola privadu sira, kona-ba konsesoins eskolar neebe atu fo ba sira.
Haktuir Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandesba jornalista STL iha edifisiu ME, Kuarta nee (16/04/2025).
“Livru manual nee inprinsipiu hau hanoin eskola privadu sira halo pedidu mai iha diresaun, atu nunee diresaun kontinua ba kurikulu nunee distribusi livru ba sira, maibe karik laiha pedidu mai mak ita koalia deit iha liur, nee ami labele hatene katak ita boot sira menus livru, ami mos presiza eskrita hatudu katak menus duni ka lae, atu informa mos katak kona-ba konsesoins eskolar ba eskola privadu, Ministeriu asina akordu ona ho sira, iha tempu badak sei halo atribuisaun osan ba sira,” nia esplika.
Nia dehan, nee osan nasaun, lei termina katak ba eskola privadu tenke hetan akordu entre Ministeriu ho eskola privadu sira asina hotu ona hein prosesu atribuisaun, montante ba eskola privadu kada estudantes ida sei hetan dolar ida, maibe eskola publiku kada estudante dolar rua, ninia montante la hanesan, nee asina tiha ona iha semana kotuk, ho Diretor Jeral Administrasaun Finansas no agora ninia prosesu lao hela.
Iha fatin seluk, Diretor Eskola Sekundariu Nobel da Paz, Jeremias P. de Jesus hatete, kona-ba konsesoins eskolar ninia, iha tinan hirak liu ba kotuk sira la hetan, tanba sira hetan osan ida nee dezde fundador matebian Pedro ninia tempu mak hetan, maibe foin daudaun sira rona ona informasaun osan nee hein deit.
“Ami hetan konsesoins nee dezde matebian Pedro sei moris, no foin daudaun ami simu ona informasaun katak, Governu liu husi ME atu apoiu konsesoins nee ba ami, maske too ohin loron osan nee seidauk tama, ami eskola privadu nee kada estudante dolar ida, nee la hanesan ho eskola publiku sira, maibe povu barak nia oan mos kontinua estudu iha eskola privadu, tanba nee oinsa atu trata asuntu nee hanesan,” tenik nia.
(jac)
