DILI, STLTIMORLESTE.com – Iha tempu badak Ministériu Edukasaun (ME) sei atribui konsesaun eskolar ba eskola públiku no privadu hamutuk 81.
Asuntu nee hatoo husi Diretor Nasional Ensinu Sekundariu iha ME, Benjamin Gomes da Cruz Fernandes ba STL, Tersa nee (24/02/2026).
“Kona-ba konsesaun eskolar ninia prosesu agora daudaun tama iha proposta orsamentu ba iha Ministra atu bele aprova, bainhira aprova ona ami bele distribui ba iha ita nian eskola Sira. Agora ami iha eskola públiku iha 74 neebe mak sei hetan konsesaun, depois hamutuk tan ho ita nian eskola privadu 7, públiku mak 74 nee inklui ho eskola filial sira,” nia esplika.
Nia dehan, bainhira proposta orsamentu nee hetan aprovasaun husi Ministra mak lori mai sira prosesu, maizumenus fulan oin nunee sira bele hetan ona konsesaun eskolar, nee ba fulan neen ninia. Eskola privadu sira bainhira dadus tama sira sei bolu atu bele asina kontratu ho sira.
“Kona-ba montante orsamentu ba konsesaun nee foin daudaun ami nian total estudantes nee rihun 40, neebe ninia orsamentu mos ita haree ba iha numeru estudantes neebe mak ohin hau mensiona, tanba eskola públiku kada estudantes US$ 2 no eskola privadu sira kada estudantes US$ 1,” nia dehan.
Entretantu Diretor Eskola Sekundariu Jeral 10 Dezembru Komoro, Manuel Verdial hatete, kona-ba konsesaun eskolar too agora sira seidauk simu, tanba sira foin konklui sira nian relatóriu ba Ministériu Edukasaun.
“Hau hanoin kona-ba konsesaun eskolar nee tanba falha iha relatóriu, laos ami mesak lae, maibe husi ita nian eskola idak-idak relatóriu la hanesan, maibe ami rezolve ona, tanba nee ami foin mak konklui ami nian relatóriu ba Ministériu Edukasaun, nee duni eskola sira sekundariu iha Munisípiu Dili, neebe relatóriu ami submete ona, hein katak iha fulan ida nee osan nee bele sai ona,” dehan nia.
Manuel hatutan, konsesaun eskolar nee kada estudante ida US$ 2 no eskola uza osan ida nee sei tuir duni nesesidade eskola nian, nee duni durante nee sira ezekuta osan ida nee tuir nesesidade eskola nian.
(jac)
