DILI, STLTIMORLESTE.com – Ministeriu Edukasaun (ME) liu husi Diresaun Ensinu Sekundariu atribui ona konsesaun eskolar US$ 23.880,00 ba eskola privadu neen (6).
“Ita iha eskola privadu iha 8 deit, maibe tinan nee ita halo akordu nee eskola 6, neebe ita sei fo konsesaun nee fulan neen ba sira, bainhira sira hatama relatoriu mai ita sei fo tan fulan hira ba sira depende ba pakote fisikal aloka mai, nee depende ba iha kuantidade osan, nee duni tinan nee ita fo ba eskola 6, tanba saida 6 deit, tanba eskola 2 la hetan ida, la hetan nee laos ministeriu lakohi fo, maibe eskola nee sei iha konflitu nia laran, liu-liu Rainha da Paz ho Novel da Paz,” dehan Diretor Nasional Ensinu Sekundariu iha ME, Benjamin Gomes da Cruz Fernandes ba jornalista STL iha nia knaar fatin Vila Verde, Tersa nee (01/07/2025).
Benjamin dehan, ministériu fo deit ba eskola privadu 6 nee, konsesaun nee ME fo tiha ona ba eskola 6, agora sira hatama relatoriu mai para husi Ministeriu bele prosesa tan konsesaun ba sira, eskola 6 nee nivel sekundariu, maibe eskola privadu.
“Agora eskola privadu 2 nee la hetan, laos ita lakohi fo ba sira,bmaibe sira sei iha konflitu nia laran, se ita fo agora se mak atu responsabiliza ba relatoriu, tanba osan nee nasaun nian, bainhira sira rezolve hotu problema nee ami bele fo kedas konsesaun nee ba sira,” katak nia.
Nia dehan, eskola privadu neebe hetan ona konsesaun eskolar nee mak hanesan ESJ privadu Externato São Jose, ESJ privadu Annur, ESJ privadu Nicolau Lobato, ESJ privadu Ossu Huna, ESJ privadu Herois da Patria, ESJ prividu Cristal.
(jac)
