DILI, STLTIMORLESTE.com – Ministeriu Edukasaun (ME) liu husi Servisu Edukasaun Munisípiu Bobonaro kontinua buka tuir bolsa kandidatu profesores husi nibel ensinu baziku neebe hanorin iha eskola Munisipiu Bobonaro, muda fatin hanorin nonok deit, laiha konhesimentu husi Edukasaun Munisipiu refere.
Liafuan nee hatoo husi Diretor Servisu Edukasaun Munisipiu Bobonaro, Miguel Freitas ba jornalista STL liu husi telefone, Kuarta nee (04/03/2026).
“Ita nian bolsa kandidatu profesores sira nee mos muda fatin nonok deit nee, ami mos la hatene tuir, ida nee mak ami sei identifika too agora nee, ami sei konfirma nafatin asuntu ida nee, tanba nee defisil tebes mai ami, los duni katak ba asuntu bolsa kandidatu profesores nain 20 neebe muda fatin nee ami seidauk hatoo informasaun ou ami nian pedidu ruma ba iha ME nasional, maibe ami sei konfirma hela,” katak nia.
Miguel dehan, bolsa kandidatu profesores neebe mak muda fatin hanorin iha eskola nee balun iha Lour, Palaka, Balibo, no iha fatin area remotas nee mak araska liu, agora bolsa kandidatu profesores nain 20 neebe muda fatin hanorin nee husi nivel ensinu baziku hotu.
“Ami nafatin buka tuir ita nian bolsa kandidatu profesores neebe muda fatin hanorin, maibe laiha konhesimentu husi ami, tanba sira muda mos nonok deit, tanba nee ami nafatin sei halo identifikasaun iha ita nian eskola sira,” tenik nia.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes hatete, ho informasaun bolsa kandidatu profesores nain 20 neebe hanorin iha eskola Munisípiu Bobonaro muda fatin hanorin ba fali sira nian munisípiu, parte Ministeriu Edukasaun (ME) nasional seidauk simu informasaun husi Edukasaun Munisípiu.
“Konaba bolsa kandidatu profesores muda fatin nee ami seidauk simu informasaun, la hatene keta parte husi rekursu umanu ME nian simu ona ka lae, nee duni ami seidauk simu informasaun ida nee, tanba nee informasaun ida nee ami seidauk hatene,” tenik nia.
Entretantu Diretor Nasional Rekursu Umanu iha ME, João Amaral hatete, ninia parte seidauk bele fo komentariu kona-ba asuntu ida nee, tanba presiza konfirma fali ho parte Diretor Servisu Edukasaun Munisipiu Bobonaro.
(jac)
