DILI, STLTIMORLESTE.com – Ministeriu Edukasaun (ME) liu husi Servisu Edukasaun Munisípiu Bobonaro, distribui ona kaderneta 3 mil ba eskola.
Lia hirak nee hatoo husi Diretor Servisu Edukasaun Munisipiu Bobonaro, Miguel Freitas ba jornalista STL liu husi telefone, Kuarta nee (07/01/2026).
“Kaderneta eskolar ami mai foti iha Dili, iha fulan Setembru tinan 2025, kaderneta hamutuk 3 mil, neebe mak ami distribui ona ba ita nian eskola sira, ami distribui ba iha primeiru siklu, segundu siklu nomos ba terseiru siklu, maibe ba setimu ano deit, nee duni kaderneta 3 mil nee ami distribui hotu ona ba ita nian eskola sira,” nia dehan.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, eskola sanolu nunee mak sei menus kaderneta, tanba bainhira eskola sanolu nee hatoo mai, husi SEM bele halo pedidu ba iha diresaun kurrikulu nasional hodi bele fo resposta kona-ba asuntu menus kaderneta nee, atu nunee ema bele fo tan kaderneta no sertifikadu pre eskolar ninia.
“Hau hanoin kona-ba kaderneta eskolar nee, ita nian eskola barak mak hetan ona kaderneta, agora eskola neebe seidauk hetan kaderneta nee, sira presiza halo pedidu mai para ita bele hatene katak hira makam seidauk hetan, setenta quatro eskola mak simu tiha kaderneta eskolar,” nia esplika.
Nunee mos Koordenador Gabinete Unidade Kurrikulu Nasionál iha ME, João Maupelu antes nee dehan, kaderneta eskolar neebe tinan nee imprimi, ME halo distribuisaun hotu ona ba iha eskola sira, kuaze noventa mil ital distribui hotu ona ba iha ensinu baziku, nee distribui ba tinan ida nee.
“Kaderneta agora ita distribui hotu ona, karik eskola balun sei menus kaderneta, nee ami hein relatóriu mai husi ita nian eskola ida-idak, nee duni ami seidauk iha lista serteza, tanba eskola neebe kaderneta la too bele fo pedidu mai para ami sei rekolha hamutuk iha eskola sira neebe kaderneta seidauk sufisiente, nee sira tenke informa mai ami nian edukasaun munisipiu hatoo fali mai ami,” nia dehan.
Kaderneta eskolar neebe tinan nee imprimi, ME halo distribuisaun hotu ona ba iha eskola sira, kuaze noventa mil ital distribui hotu ona ba iha ensinu baziku, nee distribui ba tinan ida nee.
“Ita halo distribuisaun kaderneta nee dala rua, ida noventa mil, ida seluk quarenta mil, ba ita nian ensinu sekundariu jeral quarenta mil, ba ita nian ensinu baziku kuaze noventa mil, neebe mak ita halo ona distribuisaun iha tinan ida nee,” tenik nia.
Jornalista: Jacinta Sequeira
