DILI, STLTIMORLESTE.com – Relasiona ho informasaun neebe espalha kona-ba estudante sira husi Eskola EBF 1,2 Mauboque tuur iha rai, diresaun kompetente husi Ministeriu Edukasaun (ME) distribui ona kadeira ho meza par 60 ba eskola refere.
Liu husi informasaun neebe STL sita husi pajina ofisial ME, Kuarta (28/01/2026) hatete, iha loron Tersa (27/01/2026) ME distribui ona kadeira ho meza par 60 ba eskola EBF 1,2 Mauboque, hodi hatan ba preokupasaun publiku nian neebe espalha iha media sosial iha loron (25/01/2026), komunidade husi Mauboque no manorin sira preokupa tebes ho estudante sira husi EBF 1, 2 Mauboque hodi fahe informasaun liu husi media sosial kona-ba estudante sira neebe tuur iha rai.
Bazeia ba informasaun hirak nee Diresaun kompetente husi ME desloka kedas ba iha eskola refere hodi haree situasaun eskola nian.
Nunee, hatan ba preokupasaun hirak nee, ME liu husi Diresaun Nasional Patrimoniu no Lojistika simu kedas orientasaun Ministra Edukasaun, Dulce de Jesus Soares, hodi aloka kedas kadeira hamutuk par 60 ba iha eskola refere.
Tuir informasaun husi Diretor Serbisu Edukasaun Munisipal (SEM), Likisa katak, dadersaan nee kedas ME aloka ona kadeira ho meza mai iha eskola. No oras nee daudaun kadeira ho meza aruma prontu hotu ona iha eskola, atu nunee estudante sira bele tuur hodi tuir prosesu ensinu no aprendizajen.
Biban nee ekipa husi Miniseriu Edukasaun hakarak hatoo agradese wain ba Inan aman sira, komunidade edukativa no media nasional sira hotu tanba bele fahe ona informasaun ida nee mai too iha ME.
Iha sorin seluk Xefe Eskola 12 de Outobru, Fernando Barreto dehan, eskola ida nee sei menus meza no kadeira, no husi parte Ministeriu Edukasaun nian mai foti ona dadus.
“Ministeriu foti ona dadus, maibe too agora seidauk iha rejultadu. Neebe eskola hein deit,” dehan nia.
Nia hatutan, dadus iha ona Ministeriu nia liman. Agora dadaun eskola jere tuir deit kadeira neebe iha hodi fo bá estudante sira uza.
(dom)
