DILI, STLTIMORLESTE.com – Ministeriu Edukasaun (ME) hamutuk ho dirijente nasional no munisipiu halo distribuisaun pontus Ezame Nasional ba Diretor Servisu Edukasaun Munisípal (SEM) sira.
Serimonia distribuisaun pontus Ezame Nasional nee halao iha sentru impresaun Komoro, neebe hetan partisipasaun husi Ministra Edukasaun (ME), Dulce de Jesus Soares, Sekretariu Estadu Ensinu Sekundáriu Jeral no Ensinu Sekundáriu Tekniku Vokasional, Domingos Lopes Lemos, Diretor Nasional, Munisípiu, Membru PNTL no funsionariu husi ME.
“Ohin loron 17 fulan Outobru 2025, ME hamutuk ho direjente sira hotu, hahu husi nibel nasional too nibel Munisipal, nomos too iha eskola halao serimonia distribuisaun Pontus Ezame Nasional, neebe mak mai husi prosesu naruk ida, husi tinan 9, ita nia oan sira frekuenta ensinu baziku,nunee mos tinan 12 sira frekuenta ensinu sekundariu jeral. Entaun Segunda loron 20 fulan Outobru 2025, sira tama ba iha ezame nasional, neebe mak parte ida importante iha sira nia vida akademiku,” dehan Ministra Dulce de Jesus Soares, ba jornalista iha sentru impresaun Komoro, Sesta (17/10/2025).
Dulce dehan, prosesu tomak ida nee importante teb-tebes iha joven no estudantes ida futuru nasaun ida nia vida, tanba nee ME nafatin husu ba parte hotu atu bele fo apoiu, atu nunee ezame nasional semana oin bele lao ho diak too ninia rohan.
“Dala ida tan hau atu dehan, prosesu ida nee importante, ho ida nee ita nia oan sira neebe mak iha faze preparasaun, sira atu tama ba iha ezame nasional. Dala ida tan agradese ba inan aman sira, nunee mos ba Professor sira neebe mak konsege pasiensia ho sira nia matenek eduka ita nia oan sira. Ita hein katak, prosesu nee lao ho diak, nunee sira nee mak jerasaun ida futuru nasaun nian,” nia afirma.
Governante nee hatutan, ME nian papel prepara sira atu prontu hasoru sira nian futuru neebe mak sei akontese iha tempu tuir mai. Ezame ida nee importante tebes no estudantes ida idak mak tenke prepara aan estuda.
Jornalista: Jacinta Sequeira
Editor: Domingas Gomes
