DILI, STLTIMORLESTE.com – Ministeriu Edukasaun (ME) liu husi Diresaun Nasional Ensinu Sekundariu no Tekniku Vokasional (Tekvo) esforsu aan nafatin hodi fornese fasilidade ba eskola Tekvo.
“Fasilidade nee problema komum neebe ita haree, tanba ita hotu hatene katak eskola Tekvo nee hanesan eskola neebe ezije fasilidade barak no ezije mos profesores, infraestrutura, maibe ita fo prioridade ba buat balun neebe importante liu, liu-liu ita haree ba ita nian eskola sira neebe mak ita tau hanesan prioridade liu atu dezenvolve eskola tekvo, ita tenke reforma fasilidade ba ensinu Tekvo,” afirma Diretor Nasional Ensinu Sekundariu no Tekniku Vokasional, Fernando Mouzinho Gama ba STL iha nia knaar fatin, Kuarta nee (09/04/20).
Nia dehan, ba eskola neebe fasilidade menus liu tenke esforsu aan nafatin para fornese fasilidade ba sira, liu-liu komputador ba sira, relasaun ho ekipamentus informatika ninia, garante sei fahe ba eskola sira.
“Ita iha eskola Tekvo Publiku nee 30, privadu nee 20, maibe Eskola Tekvo Publika nee ita nafatin esforsu aan, ita tenke apitu nafatin sira,” katak nia.
Iha fatin seluk, Adjuntu Direitor eskola hotelaria e turizmu iha Bekora, Charles F. Guterres hatete, too agora eskola seidauk iha laboratoriu propriu ba iha parte communication Technology (ICT) ninia, tanba iha parte ICT koalia kona-ba oinsa labarik sira bele asesu ba iha teknolojia hanesan komputador, asesu ba internet, oinsa kria email, website, oinsa mak estudantes sira bele hatene plata forma oin-oin, hanesan zoom, wa, buat hirak nee hotu, nee importante tebes-tebes ba estudantes sira.
“Defikuldade neebe mak ami hasoru kona-ba eskola seidauk iha laboratoriu propriu ba information ICT ninia, laboratoriu nee mak too agora seidauk iha ninia laboratoriu neebe mak propriu, tanba saida mak hau koalia hanesan nee, tanba ita koalia kona-ba ICT, nee importante tebes-tebes atu koresponde ba iha edukasaun ciclu 21, nee importante ita nian estudantes sira tenke domina mos ICT, laos deit estudantes, maibe tenke ba manorin sira hotu,” afirma Charles.
(jac)
