BAUKAU, STLTIMORLESTE.com – Ministeriu Edukasaun fahe rezultadu neebe alkansa ona no dezafiu neebe enfrenta iha tinan 2024, inklui divulga planu asaun anual tinan 2025 ba dirijenti eskola sira iha Munisipiu Baukau.
“Ohin hanesan mos serimonia neebe ami halao tiha ona iha munisipiu 7 no kontinua nafatin fahe rezultadu avansadu nomos dezafiu neebe enfrenta iha 2024, nomos divulga programa 2025,” hatete Ministra Edukasaun, Dulce de Jesus ba jornalista sira iha salaun Ginaziu Vila Nova, Tersa (21/01/2025).
Nia dehan, serimonia refere divulga mos informasaun kona-ba Orsamentu Jeral Estadu (OJE) 2025, neebe aloka ba ME hamutuk milhaun US$ 113 neebe atu ezekuta ba programa 5 mak hanesan dezenvolvementu institusional, pre-eskolar, ensinu baziku, ensinu sekundariu, tekniku vokasional no ensinu rekorente, inklui kedas ho infraestrutura ba kada programa.
Tanba nee, liu husi serimonia refere bele rona direita dezafiu sira hanesan menus sala, livru manual ba estudante sira inklui menus profesores nunee bele fo solusaun, tanba hanesan menus profesores ba ensinu sekundaria no tekniku vokasional tempu badak sei halo teste ba profesores bolsu kandidatu sira hodi kompleta.
Ministra argumenta, iha tinan 2025 nee hakarak implementa setor edukasaun iha Timor ho kualidade, tanba hakarak implementa servisu tuir planu aula, kurikulu no regras neebe atur ona iha Ministeriu Edukasaun.
Iha fatin hanesan, Diretora Eskola Ensinu Baziku Katoliku, São Jose Baguia, Leopoldina Joana Gutteres argumenta, rezultadu servisu 2024 nian husi Ministeriu Edukasaun iha area balu konsege atinji ona, hanesan Ezame Nasional no regular sira kuaze lao diak, maibe parte infraestrutura no numeru profesores seidauk atinji, tanba kondisaun eskola balu sei problema no eskola balu sei menus profesores ba estudante sira.
“Iha eskola sira neebe nia dezafiu ami hetan durante nee menus profesores, hahu mudansa iha Ministeriu Edukasaun hapara iha eskola ida husi primeiru anu too sestu anu profesores ida deit,” nia konta.
(EST 2)
