BAUKAU, STLTIMORLESTE.com – Ministeriu Edukasaun (ME) liu husi Institutu Nasional Formasaun Dosentes Profisional Edukasaun (INFORDEPE) fasilita formasaun administrasaun espesializada no jestaun eskolar ba dirijenti eskolar sira iha Munisipiu Baukau.
Diretora Institutu Nasional Formasaun Dosentes Profisional Edukasaun, Maria Madalena Lopes esplika, formasaun refere realiza tanba esforsu husi Ministeriu Edukasaun liu husi Institutu Nasional Formasaun Dosentes Profisional Edukasaun lansa formasaun administrasaun espesializada no jestaun eskolar ba dirijenti eskolar sira iha nivel munisipiu, objetivu atu hasae kapasidade dirijenti eskolar sira atu jere eskola hodi solusiona problema balun iha setor edukasaun.
“Formasaun nee dirijenti sira laos atu aprende, maibe kapasita sira nia aan atu bele ba implementa iha sira nia eskola hodi hadia jestaun no solusiona buat barak, tanba laos jestaun ladiak, maibe iha buat balun lao ladun diak, entaun ita kapasita sira, tanba sira mesak foun,” hateten Maria Madalena Lopes ba jornalista sira iha salaun INFORDEPE Vila Nova, Baukau, Segunda (05/05/2025).
Nia argumenta, Ministeriu Edukasaun inisia formasaun hodi fasilita dirijenti eskolar sira, laos kestaun dirijenti eskolar sira halo jestaun iha nivel eskola ba programa no seluk tan laiha konhesimentu, maibe formasaun refere atu kontinua eleva konhesimentu kada dirijenti eskolar sira, tanba dirijenti eskola balun foun.
Nunee nia sublina, formasaun neebe inisia, formasaun administrasaun espesializada kompostu modulu hitu neebe esplika liu kona-ba lideransa eskolar, jestaun finanseira, kurrikulu edukasaun, teknolojia informasaun no komunikasaun, no seluk tan atu ajuda dirijenti eskolar sira hodi hadia jestaun eskola sira neebe lao efetivu liu tan.
“Hau espera katak ho formasaun ida nee liderensa hotu iha vontade simu duni buat neebe formador sira fo ba sira nee lori ba implementa iha eskola,” Maria Madalena Lopes argumenta.
Sekretaria Munisipal ba Asuntu Sosial, Maria Viegas konsidera, formasaun administrasaun espesializada ba dirijenti eskolar sira iha Munisipiu Baukau importante tebes, tanba nasaun Timor Leste atu lao ba oin presiza tau matan ba setor edukasaun, neebe mata dalan sira Ministeriu Edukasaun estabelese ona hodi manorin sira lao tuir benefisia ba estudante sira.
“Hakarak hatoo ba dirijenti eskola sira hotu katak, aprosima nafatin materia sira, aplika toma atensaun ba ita nia oan sira, tanba sira mak jerasaun aban bainruak troka ita kontinua nafatin momentu eroi no eroina sira liberta povu nee husi kiak ba moris diak, nee presiza edukasaun,” Maria Viegas rekomenda.
Partisipasipante, dirijenti Eskola Ensinu Sekundaria Jeral Dom Carlos Ximenes Filipe Belo Afasa, Carlos Ximenes Filipe agradese ba Ministeriu Edukasaun, tanba inisia planu fasilita formasaun ba dirijenti eskolar sira iha Munisipiu Baukau.
“Nuudar dirijenti ami kontente tebes, tanba durante ami hanesan dirijenti eskola inisiu tinan 2014 too momentu ida nee mak ami tuir formasaun, nunee ami agradese ba Ministeriu Edukasaun tanba liu husi formasaun ida nee aumenta ami nia kapasidade,” Carlos katak.
Entretantu formasaun refere realiza durante loron neen, neebe dirijenti eskolar hamutuk nain 173 em partisipa, kompostu husi Dirijenti Pre-Eskolar too Ensinu Sekundaria Jeral no Tekniku Vokasional sira iha Munisipiu Baukau.
(tom)
