BAUKAU, STLTIMORLESTE.com – Ministra Edukasaun (ME), Dulce de Jesus fiar aan ho Orsamentu Jeral Estadu (OJE) 2025 neebe aprovadu, sei lori edukasaun iha Timor ba oin.
Governante nee hatoo obrigada ba Prezidente Republika Jose Ramos Horta, tanba aprova ona OJE 2025 neebe iha tinan oin sei ezekuta ba programa 5 ho orsamentu hamutuk milhaun US$ 113.
“Tinan liu ba ho tinan ida nee mos ita halo diak, maibe ho alokasaun orsamentu no esperiensia no programa neebe diak, hau fiar katak ita sei kontinua lori Edukasaun ba oin,” nia hateten ba jornalista sira iha resintu Administrasaun Munisipiu Baukau, bainhira remata serimonia isar bandeira iha Baukau, Kinta (28/11/2024).
Nia sublina, programa importante 5 refere mak hanesan dezenvolvementu institusional, pre-eskolar, ensinu baziku, ensinu sekundariu, tekniku vokasional no ensinu rekorente.
Nia fundamenta, kada programa inklui kedas ho alokasaun orsamentu ba area infraestrutura neebe Prezidente Republika rasik iha ninia diskursu fo atensaun ba area infraestrutura edukativu.
(EST 2)
