DILI, STLTIMORLESTE.com – Ministeriu Edukasaun (ME) fo formasaun lingua Ingles ba profesor nain rua nulu (20), oinsa bele kualifika kapasidade iha lingua Ingles atu melhora kualidade estudante nian.
“Ita loke oportunidade regular ida nee atu fo formasaun ba profesor sira aumenta sira nia konhesimentu iha lingua ingles, no metodu oinsa bele hanorin estudante sira hodi bele aprende ho diak,” dehan pontu fokal ba ASEAN, SEAMEO RELC iha Ministeriu Edukasaun (ME), Paulo Henrique Ribeiro ba jornalista sira iha sentru ETDA Dili, Segunda nee (04/11/2024).
Nia dehan, objetivu prinsipal husi formasaun nee, ME halo kooperasaun ho sentru rejional ba lian ingles iha Singapura, fo formasaun ba profesor sira, nunee bele melhora sira nia kapasidade ba liangua Ingles iha fatin eskola sira.
Tanba nee kooperasaun ida nee importante tebes ba manorin nain sira, liu-liu profesor nain 20 neebe tuir ona formasaun husi inisiu atu aprende metodu ensinu aprendizajen, oinsa bele hanorin no propriu no pedagojia iha liangua ingles ba estudante sira ho diak.
Entretantu Profesor husi eskola Kafe Maliana, Agusta Coemali apresia tebes ba formasaun ida nee, tanba bele fo hanorin metodu oinsa bele hanorin ba estudante sira, liu-liu aprende oinsa hakerek, lee, no rona.
Tanba nee mak husi formasaun nee hakarak, alarga liu tan ba kada munisipiu sira, nunee bele hasae konhesimentu profesor sira nian, liu-liu área lingua ingles, nunee bele harorin ba estudante sira atu aprende tuir dalan neebe iha.
(EST/1)
