DILI, STLTIMORLESTE.com – Komemora loron mundial profesores ho tema “Valorizar A voz dos Profesores Rumo A um Novo Contrato Social Para A Educacao”, no Ministeriu Edukasaun fo parabens ba profesores hotu iha Timor Leste (TL).
Komemorasaun loron mundial profesores nee halao iha salaun Ian Martin Balide, hetan partisipasaun husi Ministra Edukasaun (ME), Dulce de Jesus Soares, Prezidente Infordepe Domingos Martins, Dirijente husi ME, Diretor Edukasaun Munisipal, Superintendente, profesores inklui funsionariu husi ME no Infordepe. Loron mundial profesores selebra iha dia 5 de Outubru, maibe ohin foin selebra loron nee hamutuk ho profesores sira.
“Primeiru hakarak fo parabens ba profesores sira hotu iha TL neebe mak dedika aan ona, durante nee eduka povu Timor nia oan sira iha area remotas no iha fatin kapital sira hotu, profesores sira nee sakrifika sira nia moris atu bele eduka ema seluk nia oan, maibe ita bele haree katak, purvolta de quinze mil profesores, agora kuaze sae ba iha dizaseti mil ona, sira hotu-hotu halao sira nian knaar ho diak tebes-tebes, mezmu sira enfrenta dezafiu oin-oin, balun tenke mais de oras lima too iha sira nian eskola, balun hanorin estudantes iha sala de aula neebe estudantes barak tebes, balun sira nian edifisiu seidauk iha, maibe sira kontinua halo knaar hanesan profesor,” dehan Ministra Edukasaun (ME), Dulce de Jesus Soares ba jornalista sira iha salaun Ian Martin Balide, Tersa nee (29/10/2024).
Nia dehan, governu kontinua tau atensaun atu hadia vida profesores sira nian bem star, nunee mos kontinua konstrui fasilidade iha eskola sira, atu nunee prosesu aprendizajen povu TL nian oan ho diak liu tan, too ikus bele hetan edukasaun neebe ho kualidade, hanesan mos ho rai seluk, ohin konvida profesores sira husi Munisipiu hotu, reprezenta kada nível ensinu pre eskolar, baziku, sekundariu jeral no tekvo.
Iha fatin hanesan, Prezidente INFORDEPE, Domingos Martins hatete, loron mundial profesores nee iha dia 5 Outubru, maibe ohin mak ofisialmente selebra hamutuk ho profesor sira ho ninia tema mak atu rona lian profesores, tanba profesores neebe ohin mai nee iha area remotas, no reprezentante husi nível eskolaridade.
(jac)
