DILI, STLTIMORLESTE.com – Ministeriu Edukasaun (ME) fo tempu semana ida ba bolsa kandidatu profesores tinan 2024 hamutuk 187 sei prienxe termu aseitasaun iha Segunda too Sesta.
Diretor Nasional Rekursu Umanu iha Ministeriu Edukasaun, João Amaral hatete, fo tempu ba sira semana ida, hahu iha Segunda 25 Agostu too Sesta 29 Agostu, hodi nunee sira bele prienxe termu aseitasaun nee.
“Segunda 25 Agostu nee ita nian manorin bolsa kandidatu 2024 hamutuk 187 sei ba prienxe termu aseitasaun iha INFORDEPE, nee serteza ona, tanba ami mos publika ona iha ami nian pajina ministeriu nian. Prienxe termu aseitasaun nee ami fo tempu ba sira semana ida, hahu iha 25 too 29 Agostu, hodi nunee sira bele prienxe termu aseitasaun nee katak, sira aseita ho fatin neebe ita atu koloka sira ba hanorin estudantes,” dehan ba STL iha nia knaar fatin Vila Verde, Kinta (21/08/2025).
João hatete, manorin 187 nee Ministeriu Edukasaun sei koloka sira ba iha nivel ensinu baziku, tanba bainhira sira prienxe hotu termu aseitasaun nee, sira sei ba tuir formasaun semana ida iha Rairobo, Atabae, Munisipiu Bobonaro.
(jac)
