DILI, STLTIMORLESTE.com – Ministeriu Edukasaun (ME) fo tempu ba eskola sira too Janeiru 2026 hodi halo relatoriu konsesaun eskolar.
Diretor Nasional Ensinu Sekundariu iha ME, Benjamin Gomes da Cruz Fernandes dehan, relatóriu konsesaun husi eskola sira nee too iha loron 15 de Janeiru 2026, tanba osan ba tarde. Tanba nee fo tempu bá sira durante fulan 1 resin, ho nunee eskola sira nafatin halo relatóriu konsesaun mai iha Ministériu, liu-liu mai iha diresaun ensinu sekundariu nian.
“Ita nian Munisipiu Dili mak seidauk mai, maibe sira seluk nee hatama mai hotu ona, tanba trimester ida ikus nee foin Lautem no Dili maka tama mai, tanba nee ita nian eskola sira tenke hatama duni relatóriu konsesaun nee mai iha ME,” dehan nia ba STL, Tersa (30/12/2025).
Benjamin hatutan, too Janeiru 2026 eskola hotu tenke hatama relatóriu konsesaun mai iha Ministériu Edukasaun.
Iha fatin seluk, Diretor Eskola Sekundariu Jeral no 10 de Dezembru Komoro, Manuel Verdial hatete, relatóriu konsesaun eskolar nee presiza hatama fali ba iha Ministériu Edukasaun no konsesaun nee sira uza tuir nesesidade eskola nian.
Entretantu Diretor Eskola Sekundariu Jeral FINANTIL, Aniceto Berlelo antes nee dehan, sira sei submete relatóriu konsesaun eskolar ba ME, tanba bainhira ninia ezekusaun nee remata.
Jornalista: Jacinta Sequeira
Editora: Domingas Gomes
