BAUKAU, STLTIMORLESTE.com – Ministeriu Edukasaun (ME) foin moderniza sistema aprendizajen ba eskola Ensinu Sekundaria Jeral rua iha Munisipiu Baukau.
Diretor Servisu Munisipal Edukasaun Baukau, Afonso dos Santos da Costa informa, inisiu anu letivu 2026 Ministeriu Edukasaun estabese ona politika modernizasaun ba sistema aprendizajen liu-liu iha parte esplikasaun materia nian no seluk tan husi profesores ba estudante sira iha sala laran, tanba hahu ona uza fasilidade hanesan projetor no komputador hanorin estudante sira.
Maibe sistema modernizasaun nee iha Munisipiu Baukau Ministeriu Edukasaun foin implementa deit iha eskola Sekundaria Jeral rua mak hanesan eskola Ensinu Sekundaria Jeral 01 Tirilolo no 02 Vila Nova.
“Tuir informasaun hau rona foin mak iha eskola sentral 2 mak monta ona fasilidade nee kapas, importante mak asegura no kuidadu para ita uza ba tempu naruk, tanba nia vantajen ita tama ona erra modernu, dijitalizasaun ita nia oan sira asesu ho diak,” Afonso dos Santos da Costa hateten ba STL iha Vila Nova Baukau, Kinta (19/02/2026).
Nia sublina, fasilidade neebe Ministeriu Edukasaun instala iha eskola 2 refere, durante inisiu prosesu aprendizajem anu letivu 2026 nee hahu, Servisu Munisipal Edukasaun Baukau nia observa iha eskola 2 refere diak tebes, tanba reduz ona profesores nia tempu ba hakerek materia iha kuadru hodi estudante sira hakerek tuir, maibe tempu barak liu profesores esplika materia ba estudante sira.
Nia konsidera, instaladu ekipamentus hanesan projektor no komputador iha eskola publiku nuudar pasu ida, Governu liu husi Ministeriu Edukasaun krese ona sistema Edukasaun iha Timor Leste, maibe husu atu instala hotu ekipamentus refere iha eskola Sekundaria Publiku hotu, tanba eskola sira nee hotu Ministeriu Edukasaun nia responsabilidade hotu.
“Ita nia hakarak nee eskola hotu hotu, importante sira iha eskola hanesan diritiva eskola no profesores, inan aman no lideres komunitariu sira servisu hamutuk asegura didiak eskola nee, depois ita nia Governu fasilita ita nia prosesu aprendizajem nee ho diak,” Afonso komenta.
Tuir Diretore nee katak, estabelesidu ekipamentus hanesan projektor no komputador iha eskola rua refere utiliza ba prosesu aprendizajem nuudar projetu ida, bainhira parte eskola jere no utiliza ba tempu naruk, mak sei fo espasu ba Governu atu hanoin estabelese hotu ekipamentus refere iha nivel eskola hotu fasili liu tan prosesu aprendizajen.
Tanba nee husu parte dirijente eskola, professor no estudante sira iha nivel eskola neebe asesu ona ekipamentus refere, uza ho responsabilidade nunee bele dura too tinan naruk.
Entretantu tuir dadus neebe STL iha ekipamentus neebe Ministeriu Edukasaun apoiu ona ba eskola Ensinu Sekundaria Jeral 01 Tirilolo Baukau komputador unidade 15 no projektor unidade 15 utiliza iha sala aprendizajen 15.
(tom)
