DILI, STLTIMORLESTE.com – Ministra Edukasaun (ME), Dulce de Jesus Soares hatete, Ministeriu Edukasaun iha responsabilidade boot, atu garante edukasaun neebe kualidade ba estudante sira.
Ministra Edukasaun, Dulce de Jesus Soares hatoo kestaun nee ba jornalista sira, bainhira remata partisipa lansa Satelite, iha Palasiu Prezidensial, Nicolau Lobato, Bairru Pite, Kuarta (26/11/2025 ).
Nia husu Joven Timoroan hotu nafatin assume responsabilidade boot atu kontinua tuir buat neebe eroi sira halo ona hodi lori rai nee ba hetan indepedensia, no agora Timoroan sira kontinua hatutan iha prosesu dezenvolvimentu nasaun.
“Ministeriu Edukasaun iha responsabilidade boot atu garante katak, estudante hotu neebe iha Ministeriu Edukasaun husi pre-eskolar no ensinu baziku too sekundaria jeral no tekniku vokasional, no mensajen importante ba estudante sira mos hanesan joven no joven Timor nia sira assume responsablidade boot ida atu kontinua mehi luta neebe ita nia eroi sira tau tiha ona nunee mak ohin loron ita bele hetan ukun rasik aan, estudante sira bele eskola,” dehan nia.
Governante nee afirma, mesmu sei infrente dezafiu maibe orgulhu, tanba oras nee dadaun iha ona numeru estudante lubuk ida husi area remotas too area urbanas sira asesu ba edukasaun.
Ministeriu edukasaun nafatin kontinua serbisu atu kompleta buat neebe mak seidauk kompletu, atu nunee atu nunee bele hetan edukasaun ida neebe kualidade.
Aleinde Prezidente Republika, Jose Ramos Horta nafatin husu ba estudante no foinsae sira nafatin estuda estuda, tanba futuru nasaun iha joven sira nia liman tanba nee husu estuda hahu ohin nunee bele hasae konhesimentu no kapasidade hodi lori rai nee ba oin ho diak liu tan.
Jornalista: Emerenciana Pinto
Editora: Carme Ximenes
