DILI, STLTIMORLESTE.com – Ministeriu Edukasaun (ME), Komisaun Funsaun Publika (KFP) no Institutu Nasional Seguransa Sosial (INSS) halao enkontru ho profesores husi Eskola Baziku Filial (EBF) Nuu Laran.
Haktuir Ministra Edukasaun (ME), Dulce de Jesus Soares ba jornalista sira iha EBF Nuu Laran ,Tersa nee (08/04/2025).
“Ohin nee iha enkontru simples hela, tanba iha informasaun kona-ba profesores sira neebe mak hanorin iha EBF Nuu Laran, sira hakarak konversa oituan kona-ba reforma, sira hakarak hatene deit, karik sira tama reforma, sira sei bele simu osan hira, tanba nee mak ohin hau mai ho KFP, nunee mos husi INSS halo konversa ida nee, atu nunee bele iha preparasaun diak liu tan kona-ba sira nian reforma, no sira nian idade nee atu tama ba reforma ninia tuir lei sei iha prosesu, sira balun mos hakarak atu hatete katak, ohin ami agradese ba profesores neebe tama ona idade reforma ba sira nian moris neebe mak durante nee sira fo mai edukasaun, balun mak hanorin dezde iha tempu português, indonezia, mai too ita ukun rasik aan, nee ita bele dehan katak, ita labele selu sira, lei hatur ona sira barak mak sente ona atu deskansa, ita hakarak ka lakohi ita aplika,” afirma ME, Dulce.
ME Dulce hatutan, tuir lo-loos nee ohin halao enkontru nee ba sira neebe moras prolongada ba sira nian kondisaun la permite, entaun sira la mai iha eskola nee, maibe iha Profesora ida iha kondisaun sei mai iha eskola iha oras ida ou rua deit fila fali, no informa kondisaun ida nee, iha aplikasaun reforma obrigatoriu KFP mak sei fo notifikasaun, maibe la taka dalan tempu atu deskansa, fo oportunidade hatama rekerimentu ba ME hodi enkamina ba KFP no INSS atu bele prosesu reforma.
“Tuir informasaun preliminariu neebe ami hetan nee rihun 2 resin profesores, ida neebe mak moras prolongada ami iha 200 resin, nee mak agora daudaun servisu konjunta ida entre rekursu umanu ME ho KFP nunee mos INSS agora sira lao ba vizita profesores sira neebe mak sira nian naran iha lista ona atu konversa ho sira,” tenik nia.
Iha fatin hanesan, Diretor Nasional Sistema Informatika no Jestaun iha KFP, Moises Petroso dehan, seguransa sosial mos koa 4% nee bazeia ba fulan-fulan simu hira, entaun 4% nee bazeia ba ninia salariu, ba sira neebe mak ho moras prolongada hanesan ministra hatete, se ninia idade reforma ninia, sei iha ekipa ida husi ME, INSS no KFP tun ba halo aproximasaun hodi esplika kontajen sira nee, bele atrai tanba ninia idade seidauk too, bainhira idade too ona, nee notifikasaun otomatikamente, funsionariu hirak neebe mak tama ba idade reforma ho idade 65 ba leten hamutuk 2598.
Entretantu Tekniku Prestasoins husi INSS, Agostinho Guterres dehan, ohin informa ba profesores nain 6 katak, pensaun minimu neebe mak sei fo ba funsionariu sira, karik sira nian valor kalkulasaun nee kak kiik, pensaun minimu ita fo kategoria tolu.
(jac)
