BAUKAU, STLTIMORLESTE.com – Ministeriu Edukasaun (ME) liu husi Inspetor Eskola sira halao hela inspesaun ba profesores sira, neebe hetan treinu subar husi nia estudante sira iha tempu kalan.
Ministra Edukasaun, Dulce de Jesus rekonhese, simu ona informasaun husi eskola balu neebe grupu Arte Marsiais sei buras, tanba iha estudante balu sai treinador ba nia profesores, nee kria relasaun komunikasaun entre estudante ho profesores bele la diak, tanba profesores sei laiha vontade diak atu hanorin nia estudante neebe fo treinu iha Grupu Arte Marsiais.
Hahalok nee Dulce husu atu profesores sira kumpri regras hodi limite grupu Arte Marsiais iha eskola, hodi la implika impaktu ba prosesu aprendizajen sira, maibe daudaun iha ona faze inspesaun ba eskola sira neebe konsidera iha Grupu Arte Marsiais.
“Ita agora iha inspesaun, inspesaun mak sei halo atuasaun, kuandu eziste iha evidensia hatudu duni eskola hakiak Arte Marsiais, iha inspetor mak sei halo auto ba situasaun nee,” hatete Dulce ba jornalista sira iha salaun Ginaziu Vila Nova, Tersa (21/01/2025).
Ministra nee katak, bainhira Ministeriu Edukasaun liu husi Inspetor Eskola sira identifika profesores neebe inklina aan iha grupu Arte Marsiais sira, sei hetan sansaun depende tuir lei Komisaun Funsaun Publiku neebe estabelese ona.
Nunee husu inspetor eskola sira tenke halo identifikasaun ba eskola sira hodi prosesu profesores neebe inklui iha Grupu Arte Marsiais, tanba bele fo impaktu ba prosesu aprendizajen liu-liu estudante neebe sai treinador nee.
Iha fatin hanesan, Diretora Eskola Ensinu Baziku Katoliku, São Jose Baguia, Leopoldina Joana Gutteres rekonhese, eskola balu iha Postu Administrativu Baguia, iha profesores balu neebe sai alunus ba nia estudante iha tempu kalan, tanba Arte Marsiais.
“Bainhira estudante ida sai fali treinador ba nia mestri iha organizasaun Arte Marsiais, nee impaktu boot ba prosesu aprendizajen, tanba mestre atu hanorin, maibe nia haree treinador iha, entaun afeta ba kualidade ensinu,” katak Leopoldina.
(EST 2)
