DILI, STLTIMORLESTE.com – Ministeriu Edukasaun (ME) liu husi Rekursu Umanu Nasional halo prosesu pagamentu subsidiu transporte ba Gabinete Apoiu Tekniku (GAT) foun husi nivel ensinu baziku.
Kestaun nee hatoo husi Diretor Nasional Rekursu Umanu Nasional, João Amaral ba STL, Segunda (13/10/2025).
“Iha nomeasaun subtituisaun foun iha Munisipiu lima ou nen ida mak ami halo nomeasaun subtituisaun. Hein balun dadus seidauk kompleta no seidauk mai ami, nee hau seidauk bele koalia pagamentu. Bainhira desizaun husi Komisaun Funsaun Publiku (KFP), enkaminha mai hau, nee mak hau foin dehan pagamentu,” nia hatete.
Nia dehan, subsidiu transporte ba GAT foun, agora sei iha prosesu hela, maibe ba GAT nibel sekundariu no tekvo nee hotu ona. Ba nibel ensinu baziku sira agora sei iha prosesu nian laran.
Nunee mos GAT, Narcisio Pinto Soares Viera da Costa iha EBC Manleuna, dehan, osan nee tama tiha ona.
“Osan foin daudaun tama nee mak US$ 425. Osan nee iha mudansa, subsidiu transporte nee US$ 50, osan nee tama iha loron 22 fulan Setembru tinan nee. Osan nee ba Setembru nian deit, tanba foin asume kargu hanesan GAT,” nia informa.
Nia dehan, antes nee hanesan Professor baibain, simu subsidiu transporte nee US$ 25 deit, maibe foin dadaun asume fali kargu nudar GAT,entaun iha fulan Setembru nee foin simu US$ 50.
Entretantu Diretor EBC Manleuana, Carlos Correia hatete, agora dadaun sira nian GAT foun. GAT nee troka kedas iha fulan kotuk ba nee.
Jornalista: Jacinta Sequeira
Editora: Domingas Gomes
One Response
Oinsa halo pagamentu ba GAT FOUN sedauk simu posse nee?