DILI, STLTIMORLESTE.com – Ministeriu Edukasaun (ME), Embaixada Xina no UNICEF halao lansamentu formasaun uza teknolojia ba prosesu aprendizajen.
Haktuir Ministra Edukasaun (ME), Dulce de Jesus Soares ba jornalista sira iha salaun Ian Martin Balide, Segunda nee (02/06/2025).
“Ohin ita boot sira akompanha Ministeriu Edukasaun hamutuk ho Embaixada Xina no UNICEF lansa formasaun ida ba uzu teknolojia ba prosesu aprendizajen, apoiu ida nee konsentra ba eskola sira neebe mak sai hetan inundasaun iha tinan 2021, tanba saida, tanba momentu neeba UNICEF fo tiha ona apoiu, maibe sira kontinua tau matan ba eskola sira nee, tanba iha momentu neeba eskola sira afeitadu todan tebes-tebes prosesu aprendizajen labarik sira nian,” dehan nia.
ME Dulce dehan, hanesan ohin reprezentante husi UNICEF no embaixadora hatete ona, fo ona apoiu hanesan kadeira, materia didatiku, nomos ekipamentus eletroniku, maibe laos deit ekipamentus, maibe akompanha ho formasaun atu garante katak, ekipamentus neebe mak fo nee bele uza duni hodi ajuda estudantes sira nian prosesu aprendizajen ba iha profesores sira nian metodologia de ensinu.
“Formasaun nee partisipante pur volta 40 resin, ba vinte uma eskola, nee ba Munisipiu Dili deit, tanba momentu neeba apoiu ba eskola sira neebe hetan inundasaun. Formasaun nee durante semana ida, depois de formasaun ME hamutuk ho UNICEF no embaixada hakarak atu ba vizita eskola sira nee haree sira uza duni ekipamentus sira nee ba prosesu aprendizajen, se lae ita halo avaliasaun ida kontinua halo formasaun,” katak nia.
Nia akresenta, profesores hotu uza ekipamentus, maibe hein katak liu husi formasaun pelemenus sira balun bele hatene uza duni iha eskola sira, entaun ema hotu ho seriedade, ME hamutuk ho parseiru sira kontinua moderniza aprendizajen TL, maibe fila fali ba profesor sira atu aproveita.
Nunee mos Embaixadora Republik Xina iha TL, Wang Wenli kontente tebes atu tuir serimonia abertura ohin loron nian. Lori Governu Xina nia naran hakarak hatoo ninia parabens ba lansamentu susesu kursu formasaun ida nee. Agradese mos ba UNICEF iha Timor Leste no Ministériu Edukasaun Timor Leste ba esforsu hotu hodi implementa projetu kooperasaun Xina-Timor Leste.
“Edukasaun reprezenta esperansa nasaun ida nian. Nudar dijitalizasaun setor edukasaun nian aselera, plataforma sira ensinu online nian sai hanesan ferramenta importante sira hodi hadia asesibilidade no kualidade edukasaun nian. Treinamentu nee ho objetivu atu hasae profesor sira nia komprensaun, domíniu, no utilizasaun inovativu ba ekipamentu TIC no ferramenta hanorin online.Laos deit kultivasaun abilidade teknika sira, maibe mos inisiativa importante ida atu hakbiit estudante sira no eskola sira. Antes nee, iha enkuadramentu projetu hanesan, ekipamentu ensinu hanesan meza no estante livru nian mós fornese ba eskola sira ne’e mak sasán sira ne’ebé eskola lokál sira presiza duni.Iha futuru, ho apoiu husi Fundu Dezenvolvimentu Globál no Kooperasaun Súl, Xina iha vontade atu kontinua serbisu ho ativu ho Nasoins Unidas hodi esplora tan projetu sira iha Timor Leste, hodi apoia nia dezenvolvimentu ekonómiku, hadi’a ema nia moris diak, no ajuda alkansa Objetivu Dezenvolvimentu Sustentável 2030 Nasoins Unidas nian. Ikus liu hau dezeju programa formasaun ida nee lao kompletu no susesu,” nia dehan.
(jac)
