DILI, STLTIMORLESTE.com – Ministra Edukasaun ho Embaixador Indonezia iha Timor Leste diskute kona-ba bolsu estudu ba Timoroan sira.
Informasaun neebe STL asesu husi rede sosial ME Sesta nee (27/02/2026) hatete, iha loron Kinta nee (26/02/2026) Ministra Edukasaun, Dulce de Jesus Soares halao enkontru ho Embaixador Indonezia iha Timor Leste, Okto Dorinus Manik ho delegasaun hodi diskute kona-ba bolsa estudu neebe Governu Indonezia liu husi Pusat Budaya Indonesia (PBI) oferese ba Timoroan sira hodi kontinua estudu iha nivel lisensiatura, mestradu no doutoramentu, iha sala VIP ME Vila-Verde.
Ministra Dulce de Jesus Soares ba jornlista sira hatete, enkontru ho embaixadór Indonezia iha Timor Leste hodi koalia kona-ba servisu neebe halao ona hanesan bolsa estudu sira.
ʺEmbaixadór mos entrega dokumentu sira kona-ba bolsa estudu nian neebe sei oferese ba timoroan sira hamutuk nain 250 ba baixarelatu, lisensiatura, mestradu no doutoramentu nia. Tanba nee nakloke ba Timoroan sira atu bele aplikaˮ, tenik Ministra nee.
Enkuantu Embaixador Indonezia iha Timor Leste, Okto Dorinus Manik argumenta, rejistrasaun hahu ona liu husi TIAS ka ( The Indonesian As Scholarship) ba Timoroan nain 250 hodi kontinua iha nivel baixarelatu, lisensiatura, mestradu no doutoramentu.
ʺIda nee oportunidade ba Timoran sira atu bele aplika nomos livre ba Timoroan sira atu hili universidade sira iha Indonesia bazeia ba lista universidade nian neebe ekipa selesaun husi Indonezia prepara,ˮ dehan Embaixadór Indonezia nee.
(dom)
