DILI, STLTIMORLESTE.com – Ministeriu Edukasaun (ME) liu husi Gabinete Relasaun Publika no Protokolu hamutuk ho jornalista partisipa iha workshop kona-ba lei edukasaun, haree liu ba iha rekrutamentu dosentes ninia.
Koordenador Gabinete Relasaun Pùblika no Protokolu, Olandino Godinho Cerqueira hatoo lia hirak nee ba jornalista sira bainhira abertura workshop kona-ba lei edukasaun iha sala konferensia ME Vila Verde, Sesta nee (09/05/2025).
“Benvindu mai iha Ministeriu Edukasaun, liu-liu mai iha salaun konferensia ME, iha serimonia workshop kona-ba lei edukasaun haree liu ba iha rekrutamentu ba dosente sira, iha serimonia ida nee ninia objetivu mak fahe ba parte tolu, primeiru mak atu fahe informasaun klaru no sistemátiku, kona-ba regras prosedimentu neebe mak aplika ba eskola publiku, inklui kualifikasaun profesor, quadro pesoal no estrutura eskola, segundu mak sei esplika kona-ba prosesu rekrutamentu ba kolokasaun dosente iha munisipiu sira, terseiru mak atu haree oportunidade ba jornalista sira atu hetan no hatan ba sira nian duvida kona-ba kestaun relevante ba edukasaun,” dehan nia.
Nia hatutan, tanba nee dala ida tan ori Ministeriu Edukasaun nian naran agradese tebes ba kolega jornalista sira neebe fo tempu ona mai hamutuk ho sira iha ME, hodi partisipa iha workshop loron tomak ida nee, hahu husi tuku 9:00 dader too tuku 3:00 loraik, hodi bele sensibiliza lei sira neebe mak kona-ba rekrutamentu dosentes nian.
“Tanba nee atu habadak tempu ofisialmente hau lori Ministeriu Edukasaun nian naran hau halo abertura ka loke workshop ida nee,” katak nia.
(jac)
