DILI, STLTIMORLESTE.com – Tinan nee Ministeriu Edukasaun (ME) servisu hamutuk ho Komisaun Funsaun Públika (KFP) hodi bele identifika profesores reforma iha sistema.
Lia hirak nee hatoo husi Diretor Nasional Rekursu Umanu iha ME, João Amaral ba jornalista STL iha nia knaar fatin Vila Verde, Tersa nee (06/01/2026).
“Kona-ba dadus reforma ninia, tinan ida nee ami nafatin servisu hamutuk ho KFP liu-liu kona-ba ita nian profesores reforma ba tinan 2026 too 2027 ninia nee nain hira mak atu tama tan iha reforma, nee duni nee lao hanesan nee nafatin, tanba nee ami identifika iha sistema,” nia informa.
Joao dehan, tanba nee maske balun tinan nee reforma ona, maibe ba oin ME ho KFP nafatin halo identifikasaun liu husi sistema, hodi haree fali profesores nain hira mak sei tama reforma iha tinan nee ho tinan oin.
Entretantu Diretor Servisu Edukasaun Munisipiu Likisa, Julio da Silva hstete, profesores 56 nee husi nivel ensinu baziku mak barak, sekundariu jeral nain rua, pre eskolar nain tolu, restu nee ensinu baziku mak barak, sira tama reforma nee mak lista tama iha Ministériu nee, oinsa mak atu koloka fali iha sira nia fatin, tanba sira nee tama ona ba iha reforma obrigatoriu ninia.
“Ita nian profesores ho kondisaun moras iha Likisa nee nain sanolu resin nunee, durante nee sira la ativu hanorin estudantes sira iha eskola, dala ruma sira mai, dala ruma la mai, maibe sira nee tama hotu ona ba iha reforma. Nee duni ita nian profesores hamutuk 56 mak tama iha idade reforma obrigatoriu,” dehan nia.
Iha fatin seluk, Diretor Eskola Sekundariu Jeral 10 de Dezembru Comoro, Manuel Verdial hatete, husi sira nian eskola presiza aumenta profesores, tanba daudaun nee sira nian profesores balun tama ba iha idade reforma ninia, ho nunee presiza subsitui hikas ba hirak neebe tama ba reforma.
“Husi Ami nian eskola presiza aumenta profesores, tanba daudaun nee sira nian profesores balun tama ba iha idade reforma ninia, ho nunee presiza subsitui hikas ba hirak neebe tama ba reforma,” dehan nia.
Jornalista: Jacinta Sequeira
