DILI, STLTIMORLESTE.com – Ministeriu Edukasaun (ME) hamutuk ho parseiru halao mini workshop, hodi haree fila fali regras neebe mak atu aplika ba eskola internasional.
Ministra Edukasaun (ME), Dulce de Jesus Soares hatoo lia hirak nee ba jornalista sira iha JL-Vila Fatuhada, Tersa (25/03/2025).
“Gabinete Avaliasaun ba Lisensiamentu no Akreditasaun (GALA) halao enkontru ida ho dirijenti no funsionariu ME nian, neebe mak servisu iha area ida nee atu haree fila-fali regulamentu sira neebe mak ME hasai tiha ona iha tempu hirak liu ba, para halo fila-fali avaliasaun ba regulamentu sira nee. Tanba agora daudaun haree situasaun iha terenu katak, eskola internasional nee mosu barak, entaun ME tenke regula,” katak nia.
Dulce hatutan, ME iha lisensiamentu no akreditasaun nee iha, ezemplu fo regras ida mak hatete dehan, atu loke eskola tenke iha rai, tenke iha lisensa, profesores sira nian kualifikasaun nee saida, nee tenke iha, maibe defaktu agora GALA tun ba halo fiskalizasaun mosu eskola sira neebe mak internasional, maibe sira seidauk iha lisensiamentu husi ME, maibe sira operasionaliza ona iha terenu, eskola loke tiha ona no estudantes sira komesa eskola.
“Ida nee mak halo ME tinan ida nee atu halo fila fali konaba ezistensia husi eskola sira neebe ita ba iha rai seluk mos ita labele servisu ho vistu turista, ita tenke ho vistu trabalhu mak ita foin servisu, maibe saida mak akontese daudaun iha ita nian rai agora, ema balu iha ita nian rai dala ruma ami iha evidensia katak, sira laiha kualifikasaun atu hanorin, tanba nee ohin ME internalmentu dirijenti ho pesoal sira husi ME ami halo workshop ida atu haree fila fali padraun sira nee, depois iha tempu badak ami sei aplika, karik iha eskola balu ami tenke taka,” nia afirma.
Iha fatin hanesan, Kordenador Gabinete Avaliasaun Lisensiamentu no Akreditasaun (GALA), Antonio Tomas Maia dehan, ohin nee seidauk konvida eskola sira, maibe halo internal ministeriu husi dirijenti no parseiru sira para deskute sa regras mak presiza atu aplika ba iha eskola sira nee tuir tempu neebe iha.
“Objetivu husi mini workshop ida nee mak oinsa ita atu halo fila fali avaliasaun hodi haree fali kona-ba regras sira neebe mak ita aplika ba iha eskola sira, tanba ita hatene katak, ita iha regras sira, maibe dala ruma ho kondisaun tempu ita presiza haree fila fali hodi aposta regras sira neebe iha. Ita ohin mai iha nee diskute fila fali hodi haree kona-ba oinsa ajusta aposta regras sira tuir ho realidade neebe iha,” nia komenta.
(jac)
