DILI, STLTIMORLESTE.com – Ministeriu Edukasaun (ME) halo enkontru ho parseiru sira neebe durante nee apoiu implementasaun programa Edukasaun Multilingua (Emuli).
Ministra Edukasaun (ME), Dulce de Jesus Soares haktuir, ohin ME enkontru ho parseiru sira neebe durante nee apoiu implementasaun programa edukasaun multilíng, ho objetivu atu halo aprezentasaun ida neebe mak ekipa halo estudu vesline ida, atu haree no sai hanesan materia baze ida ba ME.
“Iha 2026 ita atu hahu halo programa Emuli iha eskola 62, entaun ita tenke iha kedan dadus baze ida no se intervensaun ita hahu agora depois tinan rua mai ita haree nia progresu halo oinsa, entaun ita labele konta istoria deit maibe ita tenke dadus,”dehan Dulce ba jornalista iha ME Vila Verde, Segunda (10/11/2025).
Nia dehan, antes atu komesa fali programa referidu, peskizador sira sei halo uluk peskiza atu bele iha dadus. Programa nee mos balu hahu uluk ona iha tinan nee, entaun antes atu hahu fila fali iha neeba peskizador sira hahu uluk ho peskiza, nunee ME bele kaer dadus baze ida, bainhira tinan rua mai bele kompara ona dadus tinan 2025 too 2027 lao oinsa.
Parseiru dezenvolvimentu sira neebe durante nee apoiu programa neemak husi UNESCO, UNICEF, CARE International no agora iha mos banku mundial neebe interese atu apoiu.
Tuir Dulce, programa Emuli atu hasae kualidade aprendizajen ba estudante sira no fasilita sira nia komprensaun ba lian ofisial sira, tanba evidensia hatudu bainhira labarik ida aprende lian neebe nia hatene ona, nia sei la lakon tempu atu lee imajem ruma.
“Ho ida nee mak ita realiza programa nee bazeia ba estudu sira iha mundu hatudu katak bainhira labarik sira aprende husi lian neebe mak nia hatene ona, fasil liu ba nia atu aprende lian daruak hanesan lian Portugés no tetun. Programa referidu implementa ona iha Munisipiu Lautem, Manatuto, no RAEOA no sei kontinua habelar ba eskola sira seluk,” nia tenik.
Nia afirma, konaba lian neebe durante nee implementa iha eskola mak hanesan Fataluku, Galolen no baineku, nunee nian progresu lao diak tebes.
Nunee mos Embaixadór Boavontade ba programa Emuli, Cristry Sword Gusmão hatete, nia parte nunka imagina atu too iha pontu ida nee, atu habelar lian tolu. Presiza formasaun ba professor ida nee hanesan prioridade neebe boot tebes ba dezenvolvimentu materia aprendizajen foun sira no alfabetu baziku sira, nunee iha oportunidade ida nee atu atualiza konaba dezenvolvimentu programa iha tinan ida-nee nia susesu makaas ba apoiu kontinua.
“Hau nunka imajina katak, ita ohin loron sei too iha pontu ida nee, atu habelar programa iha lian orijinál tolu ho signifikativu, maibe mos habelar ba komunidade lian foun sira,” nia dehan.
Nia hatutan, maibe dezafiu ida mak kualidade professor. Nee laos deit problema ida neebe limitadu ba eskola sira neebe lao iha fatin hotu-hotu.
Jornalista: Jacinta Sequeira
Editora: Domingas Gomes
