DILI, STLTIMORLESTE.com – Ministeriu Edukasaun (BK) husu ba bolsa kandidatu profesor sira labele halo protestu, bainhira koloka ba iha fatin kolokasaun.
Ministra Edukasaun (ME), Dulce de Jesus Soares dehan, ohin ME hamutuk ho Komisaun Funsaun Públika (KFP) halao abertura formasaun indusaun ba bolsa kandidatu profesores tinan 2024 hamutuk 187, neebe sei koloka ba ensinu baziku, tanba nee ME husu bolsa kandidatu sira labele halo protestu ba fatin kolokasaun.
“Laiha protestu ida husi bolsa kandidatu sira, ita la simu protestu ida ba ninia kolokasaun la tuir ninia opsaun, tanba kolokasaun por nesesidade. Ezemplu mezmu imi hakarak atu hanorin iha Dili, maibe iha Dili la presiza ona ita boot, tanba dala barak ema kobre iha area remotas no dala ruma hau ba vizita ona hatoo problema mai hau, maibe hau la obriga ema ida, tanba ME ho KFP la obriga ema atu sai profesores, maibe enkoraza ema atu sai profesores neebe mak diak no responsabilidade, laos imi entaun se tan, tanba nee mak ami enkoraza imi,” dehan Dulce ba jornalista iha edifisiu Ian Martin Balide, Segunda (22/09/2025).
Nia hatete, iha formasaun nee kona-ba materia, iha mos orden unidas, atu nunee kuandu sira ba hanorin estudantes sira ho diak liu tan. Orden unidas iha eskola, depois oinsa mak isar bandeira ho lo-loos sira sei aprende hotu.
Tanba profesores laos atu ba hanorin deit materia, disiplina sira neebe mak sira hanorin, maibe sira tenke sai edukador neebe eduka estudantes nee, tenke hatene disiplina neebe sira aprende ona, mezmu tempu hatene etika no responsabilidade.
Nia hatutan, iha tempu badak sei halo kolokasaun ba sira neebe seidauk halo kolokasaun iha 2026, hodi responde ba reforma obrigatoriu ba professores neebe sei halao iha Janeiru 2026, tanba nee kolokasaun nee kontinua nafatin.
“Materia sira neebe mak integra hanesan parte ida kurrikulu ba siklu 21 nian. Agora iha tinan 2026, planu neebe mak ami halo ona ho KFP iha 2026 professores hotu neebe pasa ona iha bolsa kandidatu sei halo kolokasaun iha 2026. Agora ita koloka tan faze terseira nee iha 187 professores, neebe iha tempu badak sei halo tan kolokasaun iha faze tuir mai atu responde ba professores neebe moras prolongada no balun mate,” nia tenik.
Nia hatutan, servisu ida nee ME, KFP no INSS, MS halo ona verifikasaun ba professores neebe tuir dadus katak, sira sofre moras.
Jornalista: Jacinta Sequeira
Editora: Domingas Gomes
