DILI, STLTIMORLESTE.com – Ministeriu Edukasaun (ME) hasai ona sirkular ba eskola hotu, tanba nee labele lori arte marsiais ba iha eskola.
Domingos Lopes Lemos hanesan Ministru Edukasaun Interinu hatoo kestaun nee ba jornalista sira iha ESJ 10 Dezembru Komoro, Tersa nee (01/07/2025).
“Hau hanoin ME mos fo ona sirkular ida ba sira hotu, liu-liu ba eskola sira hotu atu arte marsiais nee labele lori mai iha eskola, liu-liu fo hanoin ba profesores sira mak labele halo uluk, ou sira mak ema dahuluk aplika fali arte marsiais nee, tanba rezolusaun governu agora daudaun provizoriumente labele halo atividades arte marsiais no arte rituais sira neebe mak governu tau iha nee ba, tanba nee mak fila-fali ba profesor sira, maibe ita sempre fo hanoin beibeik,” tenik nia.
ME Interinu nee dehan, Ministériu sempre fo hanoin beibeik ba eskola sira hotu labele halo buat ruma neebe mak ladun diak hanesan tuda malu no riska ona naran arte marsiais nian iha paredi eskola nian, nee konvida ona ema seluk iha relasaun.
“Nee duni ita sempre fo hanoin nafatin ba ita nian professor sira atu nunee bele mantein paz iha kualker situasaun, tanba nee ita apela ba eskola hotu ho nunee labele lori arte marsiais ba iha eskola,” katak nia.
Iha fatin hanesan, Diretor Eskola Sekundáriu Jeral 10 Dezembru Komoro, Manuel Verdial dehan, ba asuntu ida nee lideransa idak-idak oinsa mak atu haree ba asuntu ida nee iha eskola sira, nuudar lideransa iha eskola servi hanesan aman ida hanesan profesor no badaen diak ida.
“Oinsa mak linguajen neebe justu no oinsa mak ninia disiplina hanorin, oinsa mak ninia prezensa iha eskola ho diak, kada loron akompanha estudantes ho diak, profesor hanesan aman no profesora nee hanesan inan,” nia haktuir.
Manuel hatutan, oinsa mak profesores sira atu transforma sai ema neebe diak, nee eskola iha tiha ona ninia regras interna, katak ba estudantes sira lapijeira no kadernu mak importante, laos lori fali tudik no fatuk mak mai,” nia dehan.
(jac)
